MAIN ASAL: Sebengkah main asal bansa benung dipandangka ngagai bala temuai dipebasa enggau mensia mayuh ke bisi datai.
MIRI: Urung 1,000 iku mensia mayuh sampal datai ngemenuhka Parkcity Everly Hotel ditu belabuh 9 nyentuk 11 Disember 2014 tu tadi laban ke rindu ngemataka Pengerami Main Asal Kenyah Sarawak.
Program tu keterubah iya diatur lalu dipasuk semua lapan pampang Gerempung Main Asal Kenyah Sarawak (PKKS) iya nya PKKS Kuching, Bintulu, Asap Belaga, Lambir, Lemeting, Lutong, Long San enggau Marudi.
Entara aktiviti ke bisi diatur nyerumba pengerami tu iya nya pekit betanda kategori indu enggau lelaki solo, koir, pekit sape enggau sebengkah main asal ke dikumbai perang bebatak tali.
Kelimpah ari nya, bisi mega diatur pekit Dara Bajik ungkup Balan Nyanding keterubah (Keling) enggau Bungan Lisu (Kumang) sereta enda tinggal pekit Tuak.
Sebengkah bansa nyual perengka main asal Orang Ulu mega bisi dibuka rambau pengerami nya.
Pengerami tu tadi ukai semina mujur matak penatai rayat bansa Kenyah tang mega matak penatai bansa bukai ke rindu deka nemu enggau silik sentang adat asal enggau main asal bansa Kenyah di nengeri tu.
Batang tuju pengerami tu diatur dikena meransang raban nembiak rebak baru enggau bansa bukai nyadika pengerami tu alai ngedut pemanah kaul enggau pangan diri.
Sama bisi datai nyukung pengerami tu iya nya Kaban Parlimen Baram Anyi Ngau enggau Kaban Kunsil Nengeri (ADUN) Telang Usan Dennis Ngau.