Nengah sukung peranak menua pesisir, atur pemansang perintah muntang agi dikemujur: Harden
SRI AMAN: Menteri Muda Pemansang Menua Pesisir enggau Pengawa Berumah, Datuk Francis Harden Hollis ngelalau semua peranak ke diau di menua pesisir ngambika enda ngelaban piak perintah Barisan Nasional (BN) nengah bantu raban penyakal di nengeri tu.
Kebuah pia laban rayat di menua pesisir agi tubah begunaka bantu ke patut ari perintah BN dikena ngemujurka mayuh bengkah projek pemansang ba endur sida diau.
“Enti kita (rayat menua pesisir) ngering diri begulai enggau piak penyakal ngelaban perintah BN, tu deka ngerumbauka pemansang ke udah dilanggur perintah ungkup kita,” ku iya.
Harden ke mega Kaban Kunsil Nengeri (ADUN) Simanggang mansutka jaku nya lebuh bejadika Program Opis Kaunsil Pelilih Sri Aman (MDSA) Begulai enggau Komuniti 1 Malaysia ke diatur ba Rumah Sanggau, Sungai Reboh Undop, Batu Lintang ditu, kemari.
Kenu ku iya, rayat menua pesisir patut berunding panjai pajakka pengawa nyukung perintah BN ngambika pemansang muntang dikemujur kelimpah tau nyungkak pemanah tikas pengidup sida.
“Tambah mega, raban penyakal semina landik bejaku tang enda ngamataka sebarang semaya ke udah ditabur ngagai rayat kelebih agi rayat menua pesisir le agi jauh tinggal awak pemansang,” ku iya.
Beduduk ari nya, Francis deka meda rayat di nengeri tu kelebih agi rayat di serata Sri Aman ngambi terus nyukung perintah BN laban semina BN ulih meri pemansang ngagai rayat.
Sama bisi datai ba atur pengawa nya, Tuai Kaunsil Pelilih Menua Sri Aman (MDSA) Richard Tawan Sedu, Sekretari MDSA, Nelson Mujah Girie, Pengulu Micheal John, Kaunsilor Andar Suntai, raban tuai rumah di serata Ulu Undop sereta bala tuai raban bansa ke bukai.
Lebuh atur pengawa nya, Harden bisi nyuaka geran bantu beungkus RM 5,000 ngagai Komit Pemansang enggau Pengelikun Genturung Pendiau (JKKK) seraya RM3,000 diungkupka ngagai Biro Indu rumah panjai nya.