SRI AMAN: Genap Tuai Rumah tauka tuai raban bansa patut ngembuan mayuh penemu ba mayuh bidang laban tu nyadi pekara pugu dikena sida ngatur pengawa ba menua diri empu.
Kaban Kunsil Nengeri (ADUN) Simanggang Datuk Francis Harden Hollis madah, genap ketuai patut bisi penemu ba nenama jaa bidang ngambika sida muntang ngemansangka pengidup rayat.
Iya madah sida ke dipilih nyadi tuai raban bansa patut bejalaika tanggungpengawa enggau penuh dedikasyen, nadai bechiping dalam ngemujurka agenda pemansang ke udah disebut perintah ungkup rayat.
“Laban ke nyadi tuai rumah tauka tuai raban bansa, kita patut besaup enggau pangan diri. Kita mega patut besaup ngiga jalai ke manah dikena mutarka penanggul ke tau ngeruga pengelantang menua,” ku iya.
Iya ti mega nyadi Menteri Muda Pemansang Menua Pesisir enggau Pengawa Berumah madah munyi nya rambau bejadi program Randau Begulai Enggau Tuai Raban Bansa enggau Chairman Komiti Pemansang Enggau Pengelikun Genturung Pendiau (JKKK) di Rumah Along, Entebar Batu Lintang ditu, kilah ensanus.
Harden madah, tuai raban bansa patut nemu genap penanggul lalu anang ngelalaika penanggul nya ari ke ditemu orang bukai ngambika iya enda raya.
Kelimpah ari nya, genap tuai raban bansa diperansang nempa kaul enggau mayuh bengkah ejensi perintah awakka sida muntang mutarka penanggul ke bisi nuntung.
Udah nya, bala Tuai Rumah enggau tuai raban bansa patut nguna servis enggau bantu ke bisi disediaka ejensi perintah nyengkaum anang malu betemu enggau pengari perintah.
“Ejensi perintah ditumbuh dikena mantu rayat. Nya alai, bala Tuai Rumah enggau tuai raban bansa payut nemu nguna servis sereta bantu ke disedia,” ku iya.
Sama bisi datai ba program tu iya nya Sapit Speaker Dewan Rakyat Datuk Doris Sophia Brodie, Pemesai Khas Kaban Parlimen Sri Aman Edmund Pirang, Temenggung Samuel Lawen sereta bala tuai raban bansa ba menua nya.
Ba program nya, Harden bisi madahka diri deka ngungkupka RM10,000 ngagai Gerempung Tuai Rumah Bagi Menua Sri Aman udah nya JKKK Rumah Along diungkupka RM5,000 enggau RM3,000 ungkup Biro Indu.
Berebak enggau nya, demontrasyen chara ngerara api bisi dipandangka ngagai mensia mayuh ke bisi datai.