Saturday, August 24

Gasak deka begelumu chara likun ‘Say No To Bangla’ kena 28 Feb tu

0

SIBU: Gerakan Anak Sarawak (Gasak) deka ngatur pengawa begelumu chara likun ‘Say No To Bangla’ di serata nengeri kena 28 Febuari ini.

Presiden Gasak, Abun Sui madah, pengawa begelumu chara likun tu deka diatur seretai ba semua kandang mengeri besai baka di Kuching, Sibu, Bintulu dan Miri, bepun pukul 10 pagi.

Di Sibu ku iya, pengawa nya deka berengkah ari Tebing Sungai Rejang, Jalai Maju lalu nuju adan di Dataran Bandar Sibu.

“Kami nesau semua peranak Sarawak nyereta pengawa tu kelai sukung ngagai program tu,”ku iya ba sebengkah aum pengarang berita, kemari.

Chairman Parti Keadilan Rakyat pampang Belaga bela madah, tuju pengawa nya dikena mandangka bantah ngagai perintah ke deka mai 12,000 iku pekereja Bangladesh gawa ba kebun sawit di nengeri tu.

“Laban ke nyadi peranak Sarawak, kitai enda setujuka polisi perintah baka enda ngibuhka peranak Sarawak empu gawa ditu.

“Atur baka tu baka ngemeluka rayat Sarawak gawa ba kebun sawit, kelimpah meri pangka bukai baka ke nyadi ba nengeri Sabah,” ku seraya madah penyampau rayat ke nadai bulih pengawa nyau majak mayuh.

Abun madah munyi nya lebuh nimbal penerang dipansutka Menteri Penguasa Pemayuh Tubuh Pengereja Pengawa, Datuk Seri Richard Riot ke nyebut raban keterubah 5,000 iku pekereja ari 12,000 dipelaba datai di Sarawak kena bulan April tu.

Riot madah, tuju ke ngambi pekereja menua luar nya dikena mutarka penanggul suntuk pekereja kira 30,000 iku ba kebun sawit.

Kenu ku Abun, rayat menua tu lebih agi bansa Dayak napi penanggul laban dini agi alai gawa, pekara tu ngujungka sida nyau belelang ngagai menua bukai baka ke Singapura, Johor enggau Lembah Klang.

Iya madah, tebal agi sida tu bisi ati deka gawa ba kompeni di menua tu ke nyendiaka pengawa puang ke setipak enggau penau sida.

“Perintah mega patut nemu, penanggul rama ke nyadi beirndik ari kelalu mayuh pekereja menua luar ke diambi gawa ba menua tu, nyengkaum kes jenayah ke majak nambah.

“Kitai enggai meda utai ke baka tu nyadi di Sarawak lalu kitai enggau ngasuh orang menua luar ngeruga pemaik enggau pengelikun ba nengeri tu,” ku Abun.

Abun mega ngasuh Opis Imigresen meresa semua kebun sawit dikena nentuka nadai pekereja ari menua luar ke tama nadai beradat gawa di nengeri tu.

“Nyema sida ari menua luar ditemu ngereja pengawa salah, tentu kitai pedis deka nyidi laban sida nadai dokumen ke diaku,” ku iya.