Pilih chalun ke ulih mai pemansang, ku Salang

0

BEJADI: Salang nyain kelai Projek Mikro Hidro seraya diperati Tuai Rumah Lugum ba Nanga Taba, Ulu Sungai Kanowit, Julau ditu, kilah ensana.

Dikearapka rayat menua pesisir terus ngundi chalun ti dipilih bediri ngena tiket Barisan Nasional

Dikarang Judan Bungap //

JULAU: Parti Demokratik Progresif Sarawak (SPDP) bisi kuasa nentuka sapa chalun sida bediri ba sitak Kunsil Nengeri (DUN) Meluan sebedau nama chalun nya dianjung ngagai pemesai Barisan Nasional (BN) nengeri enggau perintah besai maya Pengawa Bepilih Nengeri (PRN) ti deka datai.

Kaban Parlimen Julau Datuk Joseph Salang Gandum madah, Parti Rayat Sarawak (PRS) semampai nyukung sapa-sapa chalun ti dipilih BN ngarika penuduk nya.

“Taja aku ukai ari parti SPDP tang aku seigi nyukung chalun ti dipilih BN ba DUN Meluan,” pia ku iya madah maya berandau enggau pengarang berita.

Dulu agi ari nya, iya bejadika Pengerami Mikro Hidro ba Rumah Lugum Jengging, Nanga Taba, Ulu Sungai Kanowit, Julau ditu, kilah ensana.

Ba jaku iya maya ba mua mayuh, Salang ngansak rayat ba menua pesisir semina ngundi chalun ti beperabungka Barisan Nasional (BN) aja.

Iya madah, enda lama agi Pengawa Bepilih Kunsil Nengeri (PRN) deka diatur alai awak ke diberi ngagai rayat nentuka sapa pengari ti endang ulih mai pemansang sereta ulih ngangkatka pengidup rayat.

“Nya alai, kitai anang saru enggau jaku umbuk orang ti datai ngelawa sida.

“Kita (rayat) meseti landik milih chalun laban menua pesisir agi tubah randaka pemansang,” ku iya madahka baru.

Salang ti mega Chairman Kaunsil Penyanding Penemu 1Malaysia Sarawak (1MSAC) maya tu madah ngagai pengarang berita, pemutus Menteri Besai ngadu baru bajet menua tu bisi ngeruga pejalai projek sida.

Kebuah pia ku iya laban enda semua belanja projek 1MSAC ari perintah magang tang mega bepanggai ba opis korporat.

Ngena pemujur projek rumah panjai nya, Salang, muji pengeransing peranak rumah panjai nya ti besaup nembuka projek mikro hidro nya ti beungkus RM350,000 dalam timpuh urung tiga bulan.

Kelimpah ari nya ku iya, rumah panjai ke besemak mega bisi datai nyaup bala ba rumah panjai nya.

Iya mega maya tu bisi madahka projek ti sebaka deka digaga ba menua bukai bepanggai ba penyampau belanja opis sida.

Projek ke bukai ti digaga 1MSAC iya nya projek bekal ai beresi, ngemanahka rumah nyengkaum pengawa lumba enggau main.

Bela bisi datai maya pengerami tu iya nya Kaban Parlimen Mas Gading Anthony Nogeh, ex-Kaban Parlimen Ulu Rajang Billy Abit Joo enggau Direktor Besai Projek Belayong Jampong.