SADIA Kuching nyukung langgur penemu nguna leka jaku ‘Dayak’

0

Dikarang Chris Bishop //

KUCHING: Serakup Dayak Iban (SADIA) pampang Kuching sepenemu enggau majoriti gerempung tauka NGO ti ngarika bansa Dayak, nyukung leka jaku ‘Dayak’ dikena dalam ruang bansa ba form perintah.

Chairman iya, Datuk Dr Anthony Nait madah bansa Dayak ke nyadi peranak asal nengeri Sarawak, Sabah enggau Kalimantan seigi patut ngena leka jaku ‘Dayak’ nganti ‘Lain-Lain’ ti dikena ngelamatu.

“Leku jaku ‘Dayak’ seigi jaku ke pemadu engkeman dikena ngelai kitai bansa Dayak di Sarawak enggau Sabah ti bisi mayuh bengkah etnik.

“SADIA pampang Kuching nyukung sereta sepenemu enggau NGO bukai sentang pematut leka jaku ‘Dayak’ diguna ba form perintah lalu ukai bumiputera,”ku iya lebuh dikerandau pemberita kemari.

Nait nambah, langgur penemu ngungkup seiti leka jaku ba ruang bansa iya nya ‘Dayak’ ba form perintah diterima semua bansa Dayak di serata Sarawak.

Kitai meri puji enggau pengawa manah Kepala Menteri Datuk Patinggi Tan Sri Adenan Satem ti udah mujur minta pemendar ari Perintah Besai ngambika nukar leka jaku ‘lain-lain’ ba ruang bansa dalam form perintah diganti enggau Bumiputera (Iban, Bidayuh, Orang Ulu enggau ke bukai), tandu iya.

“Taja pia, leka jaku “Dayak’ lebih agi engkeman dikena nganti ‘lain-lain’ munyika dipinta semua gerempung enggau NGO di Sarawak enggau Sabah,”ku iya.

Adenan ba sebengkah pengerami di Kapit bedau lama tu tadi udah mansutka penerang sentang pekara nya lalu nerima timbal ke manah ari raban ketuai di Sarawak.

Entara NGO ti minta leka jaku ‘Dayak’ dikena iya nya Kongres Bansa Dayak (DNC), Gerempung Bansa Dayak Bidayuh (DBNA), Raban Nembiak Parti Rakyat Sarawak (PRS), Gerempung Nembiak Dayak Sarawak (PEBEDAS) sereta ke bukai.