Ketuai Nembiak PRS mandangka penyiru ngabas pesakit ari Belaga ke diperubat ba SGH

0

KUCHING: Ketuai Nembiak Parti Rakyat Sarawak(PRS) Pampang Belaga Bit Surang bisi ngabas orang sakit ari Belaga ke benung diperubat di Sepital Besai Sarawak (SGH) kena Hari Empat tu tadi.

Entara sida ke benung diperubat ba SGH iya nya raban bansa Penan ari Long Urun, Long Malim enggau bansa Kenyah ari Long Lawen sereta sekeda orang sakit ari Belaga.

Maya datai ngabas sida ke sakit nya, Bit bisi nyuaka bantu pemakai, pekayan enggau anak belanja.

“Tu sebengkah ari pengawa bantu ‘volunteerism’ ke udah dipesetuju diadu rambau aum ke diatur di Bintulu bedau lama tu tadi,” ku Bit nengah surat penerang berita kemari.

Bit ke mega Ketuai Pemadah Raban Nembiak PRS madahka penemuai nya nyadi sebengkah pengawa rama ti mai reti ke besai ke alai sida kelimpah meri peransang ngagai sida ke sakit.

Ku iya, pengawa nya setipak penemu Menteri Besai Datuk Seri Najib Tun Abdul Razak ti ngansak raban nembiak Malaysia bela nyaup ngemansang komuniti nengah pengawa ‘volunteerism’.

“Berindik enggau nya, kitai meransang raban nembiak ke diau di menua pesisir begempung lalu ukai semina mantu pangan diri tang mega bela mantu komuniti nengah ayu ‘volunteerism’,” ku iya.

Ngenang kaul ke sama, Bit ngenataika penyinu ati ngagai seiku indu bansa Penan ari Long Urun ke semina mai tubuh diri ke SGH ketegal ti berumban ngibun anak indu iya ti benung diperubat.

Iya muji seiku indu misi di SGH laban udah ngenataika pemar ke ditapi indu Penan nya ngagai iya.

Bela nyempulang penemuai Bit, bini iya Lydiawati Beki, Presiden Kelab Nembiak Belaga (KBBS) ke mega kaban sayap nembiak PRS Belaga, Romio Ding enggau kaban nembiak bukai.