Kilang Sawit Merindun dikearap meli sawit raban pekebun mit

0

Diatu kilang tu diperita semina meli sawit ari kompeni besai aja, pekara tu ngenusah bala pekebun mit ke tepasa nyual sawit ngagai orang tengah 

LUBOK ANTU: Raban pesereta Kebun SALCRA Pelilih Lubok Antu diatu napi penanggul tusah deka nyual buah sawit sida sekumbang Kilang Sawit Lemanak di Merindun, Lubok Antu angus kena 31 Ogos taun nyin kemari.

Berindik ari nya, raban pekebun mit ba kandang menua Lubok Antu tepasa nyual sawit sida ngagai orang tengah tauka ngagai palan pemeli ke jauh ari genturung pendiau sida.

Nitihka penerang, lebih 600 iku pekebun mit bisi nyual buah sawit sida ngagai Kilang Sawit di Merindun, Lubok Antu ngelama tu.

Tang diatu, Kilang Sawit Lemanak di Merindun enggai meli tandan sawit sida agi, lebih ngenyinuka ati sida madah, Kilang Sawit di Merindun tu semina deka meli tandan sawit ari kompeni besai aja.

Berindik ari nya, sida tepasa nyual buah sawit ngagai orang tengah ke jauh lebih murah ari ke nyual ngagai Kilang Sawit Lemanak, di Merindun.

Sekretari Komiti Sentara Pekebun Mit Sawit (JKS-PKS) Pelilih Lubok Antu, Ambun anak Nyanggah madah, penanggul nyual buah sawit ngagai orang tengah iya nya rega kelalu mit iya nya urung RM295-RM320 setan enti dibanding rega sawit dibeli Kilang Sawit Lemanak di Merindun (lebih RM400 setan).

“Kami ukai semina betapi enggau rega kelalu baruh enti nyual ngagai orang tengah tang mega tepasa nganjung jauh iya nya urung 50 kilometer pejalai, kelimpah mayar tambang kereban pengangkut entara RM150 nyentuk RM200 sekali pejalai,” ku iya madah ngagai pemberita, ditu kemari.

Berebak enggau nya, Ambun madah, bala sida ke nyereta Kebun SALCRA Pelilih Lubok Antu berasai enda lantang ati meda ulah Kilang Sawit di Merindun nya ke enggai meli sawit sida tang semina meli sawit kompeni aja.

“Kami ngarapka Kilang Sawit Lemanak di Merindun ulih mutarka pekara tu enggau lengkas laban bala pesereta diatu chukup tusah deka nyual buah sawit diri empu.

“Timbal ari piak ke bekait ditagih amat ngambika bala pesereta nadai napi penanggul suntuk belanja, bebayarka utang enggau utai bukai berindik ari penanggul nya,” ku iya.

Bela nyempulang iya ngenataika sebana nya Tr Bak Baring (Chairman), Tr Ngilah Ela (Sapit Chairman), John Batang (Mandal Sekretari), Unya Ngali (Tukang Wang), Tr Jubang Bin (AJK Kanan I), Tr Jawak Alex (AJK Kanan 2) enggau Tr Narok Ran (AJK Kanan 3).