Monday, August 10

Alfred Jabu: Anang enda ransing ngulihka pemujur

0

Bansa Penan bisi penau teulihka pemujur sebaka enggau bansa bukai lalu sida patut neladan orang ke udah mujur

MIRI: Pemujur enda ulih datai ngapa enti kitai empu enda ransing ngiga tauka bebendar ngulihka sesebengkah pekara, ku Sapit Kepala Menteri Datuk Patinggi Tan Sri Alfred Jabu Numpang.

Berindik ari nya, iya ngelalau raban bansa Penan patut neladan sekeda ari bansa sida ke udah teulihka pemujur.

“Nyema bansa Penan deka mujur ba pengawa nanam getah enggau bekebun sawit, aku ulih nulung kita minta bantu ari piak ke bekaul,” ku iya maya program nyuaka bantu dikena ngaga rumah ngagai semilan buah kampung Penan di Long Daloh kena hari Lima minggu tu tadi.

Kenu ku iya ke mega Menteri Betanam Betupi Chara Moden, bantu ulih dipinta ari Opis Betanam Betupi lalu udah nya sida deka bejalaika atur pengawa.

Taja pia, bantu ke deka diberi perintah nengeri tauka perintah besai nya enda nyamin pemujur enti sema raban bansa Penan enda ransing bejalaika pengawa diri.

“Peda kita Temenggong Datuk Hasan Sui seiku orang ke udah mujur, taja pia mayuh pemar ke ditapi iya sebedau ke teulihka pemujur,” ku Jabu ke mega Menteri Pemansang Menua Pesisir.

Bansa Penan bisi penau teulihka pemujur sebaka enggau bansa bukai.

Nya alai, Jabu ngelalau komuniti Penan enggau semua komuniti Orang Ulu terus majak nyukung perintah Barisan Nasional awakka ulih ngasaika semua pemansang ke udah dilanggur.

Pekara tu ku iya, seriris enggau juluk Kepala Menteri Datuk Patinggi Tan Sri Adenan Satem ke udah nyemetak madah iya chukup ngemeratka pemansang di kandang menua pesisir.

Ngenang sentang bantu nya ke diberi sehari nya, urung 300 ruang bilik bansa Penan ari Long Daloh, Long Luteng, Long Lilim, Ba Kawi, Ba Itam,  Ba Kabeng, Long Beku, Long  Luding enggau Long Jekitan nerima bantu dikena ngaga rumah baka atap sepindit, kayu, paku, penyayat. Semua bantu tu datai ari Kompeni PANSAR Sarawak lalu digaga sida nyadika sebengkah tanggungpengawa koporat rama sida.

Jabu ba program nya bisi madahka diri deka meri geran Projek Mit Pemansang Menua Pesisir RM10,000 dikena sida nangkir gerija di kampung nya.

Sama bisi datai iya nya Menteri Muda Rengka Rama Datuk Stephen Rundi Utom, Kaban Kaunsil Menua Senator Lihan Jok, Kaban Kunsil Nengeri (ADUN) Telang Usan Dennis Ngau Jok, Sapit Sekretari Perintah Nengeri Datuk Ose Murang, Residen Miri Antonio Kahti Galis, Tuai Raban Bansa Penan Temenggong Datuk Hasan Sui.