Flat Sibu Jaya meletup lalu runtuh

0

SIBU: Bunyi bom ke meletup ingar dipelaba bepun ari tong gis ke bumbus ngujungka mensia mayuh ke diau ba Flat Sibu Jaya begau tumu pagi kemari.

Penusah tu nyadi urung ya pukul 2.48 pagi lalu ngujungka mai pengerusak ke balat ngagai sebengkah begunan flat dua tingkat Blok E.

Nitihka pansik raban polis enggau Opis Pengerara Api enggau Penyah Penusah (BOMBA) madahka, utai ke meletup nya bepun ari sebuah bilik ba begunan flat nya.

Nitihka penerang, penusah nya ngujungka seiku orang raya bakal maya iya deka ngidupka suis lampu rumah nya.

Seiku sida ke nguna rumah nya, S’ng Guan Hock, 51, udah balat bendar bakal sereta betu 52 peratus ba tubuh, lalu benung diperubat ba Sepital Besai Sibu.

Bisi 10 iku sida ke sama bakal benung diperubat ba sepital. Entara sida ke bakal iya nya Chental Angellica beumur 21 hari, Rity Petrus, 18, Fatrica Petrus, 17, Vennisssa Niza, 14, Babyana Fitricey, 13, Albert Giman beumur 46 taun enggau Caroline Alo Giman, 46 taun.

Tuai Polis Pelilih Menua Sibu ACP Kamal Kordi maya ke dirandau ba palan penusah tu nyadi madahka pekara ti nyengala ngasuh penusah tu nyadi agi benung dipansik.

Ku iya, raban polis forensik ari Kuching dipelabaka deka mansik penusah tu.

“Aku udah dipadah, pansik silik deka digaga raban forensik bekaul enggau penusah tu.

“Raban Polis mega udah minta sida ke nguan begunan flat tu mindah ari rumah sida dikena nyaga pengelikun diri,” ku iya.

Nangkan nya, sida ke ditinggang penusah udah diasuh ngenduh ba Balai Mensia Mayuh Sibu Jaya enggau Balai Mayuh Guna Opis Polis Sibu Jaya.

Sekeda ejensi perintah iya ke bisi datai mantu baka raban Polis enggau Bomba, Opis Pengintu Pengelantang Mensia Mayuh, Opis Residen Sibu, Ambulans enggau Opis Penyaga Orang Periman Malaysia.