ADAT IBAN: Rundi (tengah), Salang (dua kanan) begulai enggau pemesai bukai sama bela ngiling tikai ke tanda nutup pengerami Gawai Dayak 2015 renggat Pelilih Menua Bintulu ti diatur malam Hari Enam tu tadi.
BINTULU: Bansa Dayak di menua tu diperansang besemekih enggau bansa bukai ba mayuh bengkah pengawa dagang enggau industri ngambika bela mansang baka bansa bukai ke nguan menua tu, ku Menteri Muda Perengka Guna Mensia Mayuh (Bekal Karan Enggau Penyambung), Datuk Dr Stephen Rundi Utom.
Ku iya, beduduk ari Pelilih Menua Bintulu ti benung ngerembai ba pengawa dagang, industri enggau pengawa ekonomi bukai baka diatu, bansa Dayak endang naka ulih ngerebut peluang kereja, industri enggau dagang ti diadaka perintah dikena ngemanahka penatai pemisi diri.
“Nya alai, aku ti endang seiku ari Kaban Kunsil Nengeri (ADUN) Kemena enggau naka ulih mantu sereta meri buah runding ngagai peranak menua ditu lebih agi ti diau ba menua pesisir ngambika semampai besemekih ba mayuh bengkah pengawa industri enggau dagang ti bisi diadaka perintah kena nyungkak penatai pemisi ruang bilikdiri,’’ ku iya.
Rundi mansut ke jaku tu ba pengerami Ngiling Bidai Gawai 2015 ti diatur begulai Sarakup Indu Dayak Sarawak (SIDS) Pampang Bintulu begulai enggau gerempung Dayak bukai ba sebengkah restoren ditu, malam Hari Enam tu tadi.
Ku iya, beduduk ari pemansang industri enggau pengawa dagang ti majak ngerembai ba menua Bintulu tu, bala nembiak rebak baru lebih agi ti deka nampung pelajar ba palan pelajar tinggi patut nemu milih bagi kus ti balat dipeguna lebih agi pelajar teknikal baka pinta ari SCORE.
“Nya alai, pelajar teknikal tu endang balat dipeguna ke dikena napi pemansang menua tu ti beguna ke pekereja landik enggau setengan landik maya taun 2020 tu ila,’’ ku iya.
Lebuh ti bejaku mega, Rundi meransang bala raban apai indai nembiak ambika semampai bebenda nyengula anak sida ambika sida mujur ba pengawa pelajar jemah ila.
Ku iya, enda ngawa kitai (apai indai) merinsa reta, tang asal meh anak sida pandai sekula, diak deh bala anak nya tadi deka bulih pengawa ti manah jemah ila ti ngujungka sida bulih penatai belanja ti chukup tegap enggau pengidup ti menyana.
Bela bisi ngulu atur pengawa nya, Sapit Menteri Dagang Temuai enggau Main Asal Datuk Joseph Salang Gandum enggau Kaban Parlimen Bintulu, Dato’ Seri Tiong King Sing sereta ke bukai.