Pekara nya dipeda bepelasarka sukung rayat ngagai presiden PRS,Dr James Jemut Masing di Balleh
KAPIT: Parti Rakyat Sarawak (PRS) arap endar ati ulih ngerampas baru sitak Pelagus ari penyakal sereta ngetanka sitak Balleh ba Pengawa Bepilih Kunsil Nengeri (PRN) ti deka datai tu ila.
Ketuai Pampang Nembiak PRS Balleh, Kaunsilor Bakat Gira madah munyi nya bepelasarka gaya pengundi di Pelagus ti meri sukung penuh ngagai presiden PRS Tan Sri Datuk Amar Dr James Jemut Masing di Balleh.
“Sekali tu, kami konfiden ulih ngerampas baru sitak Pelagus laban semua parti komponen ke ditu diatu beserakup napi pengawa bepilih.
“Naka ke diatu Balleh enda ngirauka ati, Masing mengkang tegap laban iya seiku orang politik ti landik, realistik sereta ngemaruhka diri,” ku Bakat madah ngagai BAT V empai lama ke udah.
Ku Bakat, rayat di Pelagus udah rugi RM1.5 million ari Projek Mit Pemansang Menua Pesisir (MRP) ninting taun laban pengari rayat ke diatu, George Lagong ari penyakal.
“Ketegal nya mega, rayat nemu sida udah silap lalu besemaya deka ngundi BN maya PRN ke dudi tu ila.”
“Kelimpah ari PRS, komponen parti bukai baka PBB ti diarika Sapit Menteri Pemansang Menua Pesisir enggau Kandang Menua, Datuk Alexander Nanta Linggi, SUPP enggau SPDP diatu berakup napi PRN ti deka datai tu ila,” ku Bakat, ti mega Kaban exco pampang Nembiak kaunsil PRS.
Sapa ti dipilih BN will bediri di Pelagus, ku Bakat chalun nya enda tau enda dikemendarka parti.
“Diatu kitai bisi dua iku manuk sabung ungkup sitak Pelagus. Sapa ti dipilih enda tau enda ngena raba bepilih parti sereta bisi sukung ari mensia mayuh ba kandang menua nya,” ku Bakat.
Penemu Bakat dikunsi enggau Temenggung Tan Kian Hoo ti pechaya sitak Pelagus ulih diambi pulai ari jari penyakal.
“Raban bansa China di Kapit diatu beserakup di belakang BN enda ngira nama runding orang bukai pasal sida. Taja pia, bisi mega nya endang penyukung kuat penyakal.”
“Ungkup Balleh, Tan Sri Masing patut nadai penanggul ngetanka penuduk iya laban iya seiku ketuai ti nadai belalai lebuh bejaku ngetanka hak komuniti Dayak, ukai semina di Kapit tang diserata Sarawak,” ku Tan.
Seiku orang dagang menua nya, Sia Shiu Pau pechaya bansa China deka nulung BN ngerampas sitak Pelagus.
“Aku udah enggau Datuk Alex ti mega Kaban parlimen Kapit bejalai ba sebelah sitak Pelagus lalu rayat dia diatu bebasaka BN, ke tebal agi majoriti pengundi bansa Iban,” ku Sia.
Taja pia, enti presiden SWP Larry Sng deka bediri ba sitak nya, iya deka betapi enggau pemar laban iya diatu dalam penyakal.
“Sebedau tu, rayat nyukung George ketegal sekeda pekara,” ku iya tang nadai nerangka kebuah nya.
Kaban PRS Balleh, David Sanggau madahka Masing enggau chalun BN ungkup sitak Pelagus patut nadai penanggul menang ba kededua sitak BN nya maya PRN ila.
“Kami udah bebendar gawa betemu enggau rayat sereta nemu sentimen rayat. Nya alai kami arap endar ati lalu ukai semina melaba aja,” ku David.