Semua aktiviti patut ngemeratka penyerakup entara raban bansa sereta pengelikun, pengelantang menua
Dikarang Jacqueline David //
KUCHING: Gerempung ukai dikuasa perintah (NGO) ti nerima geran ari perintah ngambi bisi dikena bejalaika aktiviti dikarapka enda limpang ari penemu sereta juluk ti dikedekaka perintah.
Menteri Pemansang Rama Tan Sri William Mawan Ikom madah, anang limpang ari pengawa ke enda setipak enggau peneka perintah.
“Anang ngatur pengawa ke enda setipak enggau juluk sereta peneka perintah ke tau bendar ngeruga pengelantang pengelikun menua. Kitai patut nemu, pekara ke enda manah jampat ngelekai lalu pia mega nya tau mechah kaul entara pupu raban bansa di menua tu. Perintah meri bantu ngagai semua gerempung tang gerempung dipejalai nitihka atur diri. Nya alai, gerempung tauka orang ke ngatika diri sereta bisi perambu dalam timpuh ke panjai, tau berandau pasal pekara nya enggau aku di Opis,” ku Mawan.
Iya madah munyi nya ba atur pengawa ke alai iya meri geran penyampau RM130,000 ngagai 5 buah gerempung, Kelab Golf Sarawak (KGS), Komiti Pesta Nanas, Kelab Rando Saratok, The Archbishop of Kuching enggau Gerempung Indai Tunggal Sarawak di opis menteri nya di Bangunan Baitulmakmur di Kuching ditu, kemari.
Sebarang bantu ti diberi ku Mawan, ari ati perintah lalu mandangka perintah siru sereta ngemeratka rayat.
“Pelaba aku nadai perintah tauka opis menteri bukai dalam dunya tu siru ke NGO, gerempung, serakup, kelab sereta sekeda gerempung bukai. Taja pia, anang kelalu bepanggai ba perintah dalam pekara geran. Kitai patut begempung ngiga belanja sereta bantu ngambika ulih bejalaika aktiviti,” ku iya.
Kelimpah ari nya, iya ngelalau semua NGO ke bisi minta geran ngambika enda ngaul aktiviti tauka pengawa sida ngena penyarut ‘politik’.
Nya alai ku iya, gerempung, serakup sereta NGO anang mai ‘politik’ tauka utai ke enda manah ngagai serakup tauka gerempung kita empu, ku iya.
“Ulah nya enda kondusif lalu enda mai pemanasang ke manah. Enti kita udah ngaga pengawa kitai enggau manah, gaga akaun kita enggau manah, anjung ngagai opis menteri lalu enti kita agi begunaka duit, perintah agi ulih mantu. Tang enti nganti ujung taun aja, nganti diri nurun makai angin lalu enda ngaga pengawa, ke agi tu ila, geran kita pan kena putung,” ku iya.
Ari pun taun tu tadi, penyampau geran ke udah dibagi ari opis KPS tu manggai urung RM5.4 juta ti diberi ngagai NGO, gerempung, serakup sereta palan bukai, lalu agi bisi sekeda peminta ke bedau diberi.
“Baka diperatika aku, kitai ke diau di mengeri ngumbai diri patut nerima geran mayuh agi tang ba aku peranak ke nguan genturung pendiau tauka rumah panjai patut agi diberi mayuh,” ku iya.