Dikarang Judan Bungap //
SIBU: Lebih 500 iku raban Sarawak For Sarawakian (S4S) datai bebala mayuh begempuru ba Dataran Sibu ditu, pagi kemari.
Pengawa begempuru ti keterubah iya diatur di Sibu tu betuaika chairman komiti pengatur Tay Swee Teck.
Maya berandau enggau pengarang berita, ku Tay, pengawa ke diatur nya digulu bala raban S4S ari Sarikei, Kapit, Bintangor enggau Sibu empu.
“Tuju kitai ngatur pengawa tu laban deka nyediaka diri ngintu Hari Sarawak Merdeka Ke-52 ti deka diatur di Kuching kena 22 Julai ti deka datai,” pia ku iya madah.
Berebak enggau tu mega, Tay madahka S4S semina rambai leka jaku tang ukai gerempung ukai dikuasa perintah (NGO).
“Raban kami datai ari pupu raban bansa ti taluk ke menua Sarawak.
“S4S ngembuan tuju deka ngemeratka pengelikun 18 sempekat menua Sarawak,” ku iya madahka baru.
Pengawa ke diatur tu dipejalaika enggau likun kelimpah bela dikemataka bala polis.
Dulu agi ari tu, raban sida merambu deka bejalai bebala mayuh berengkah ari Dataran Sibu ngelawa Pintu Gerbang Sibu.
Taja pan baka nya, piak polis enda ngemendarka perambu sida ketegal ngira pengelikun trafik enggau pengawa mensia mayuh ke bukai.