Sebuah IPT patut ditumbuhka di Sri Aman

0

Kolej Komuniti diperambu deka digaga ngambika nembiak ditu enda ibuh belajar jauh

SRI AMAN: Perintah bisi perambu deka ngaga Kolej Komuniti di sitak Sri Aman udah tu ila, ku Menteri Muda Pemansang Menua Pesisir enggau Pengawa Berumah, Datuk Francis Harden Hollis.

Ku iya, sigi patut sebuah institut palan pelajar tinggi baka Kolej Komuniti ditumbuhka di Sri Aman ditu.

“Tu dikena meri peluang ngagai raban nembiak ditu ke deka nampung pelajar sida ngagai Institut Palan Pelajar Tinggi (IPT) ulih belajar di menua tu empu sereta enda ibuh pansut ari menua Sri Aman.

“Ukai semina nya aja, iya mega diperatika ulih ngurangka ungkus belanja sida ti deka nampung pelajar pansut ari Sri Aman,” ku iya.

Harden ke mega nyadi Kaban Kunsil Nengeri (ADUN) Simanggang mansutka jaku nya ngagai pemberita rambau Pengerami Ramah Tamah Aidilfitri sereta Pengawa Nyuaka Perais Pekit Pintu Gerbang, Piala YB Datuk Francis Harden Hollis diatur Semilan buah Komiti Pemansang enggau Pengelikun Genturung Pendiau (JKKK), Gempung Raban Masjid sereta Surau kawasan N.27 Simanggang bepalan di Dewan Suarah semak ditu, malam kemari.

Kenu ku iya, enti diperatika ari sukut penyampau peranak menua ke diau di Sri Aman kandang ke diatu nyau majak nambah, rayat kitai ditu begunaka bendar ke penumbuh sebuah IPT ditu.

“Kitai mengkang berunding enggau beberapa buah kolej ti bekaul pasal pekara tu sereta kitai besai endar pengandal deka meda sebuah kolej komuniti ulih ditumbuhka ditu.

“Nya alai, kitai chukup begunaka sukung ari rayat ngambika juluk tu tejapai. Pemujur tu ila ukai semina ungkup kitai aja tang mega ngagai anak sereta uchu-ichit kitai jemah,” ku iya.

Berebak enggau nya meda, Harden madaka, gempung raban bansa ti udah dikemeranka di menua tu patut dinanka kitai dataika belama iya.

“Kitai di Malaysia nyengkaum di Sabah enggau Sarawak patut beterima kasih ngagai pengawa beserakup entara raban bansa iya ke diatu. Kitai semua ulih duduk seiti mija, gempuru begulai makai nadai ngira raban bansa entara kitai.

“Nya alai, Malaysia udah nyadika chunto ngagai dunya kelebih agi ba pekara bekaul enggau penyerakup,” ku terang iya.

Bela bisi nyempulang Harden dalam pengerami nya, Kaban Parlimen (MP) Sri Aman, Residen Bagi Menua Sri Aman, Jonathan Lugoh, Penyanding Penemu Pengatur Pengawa, Pengulu Abdul Samad Abdul Rahim, Chairman Pengatur Pengawa, Alhias Muhi sereta sekeda raban ke bukai.

Berebak enggau pengerami nya, Harden mega ngemendarka agih belanja penyampau RM10,000 ngagai Masjid Darul Syakirin Kampung Muhibbah, RM5,000 ngagai Surau Al-Amin, Taman Sri Jaya sentara semilan buah JKKK Melayu enggau Taman di kawasan N.27 Simanggang nerima geran RM3,000 ke genap buah gerempung nya.

Harden mega bisi besemaya deka meri lima iku chapi ngagai JKKK Melayu di kandang menua nya rambau pengerami Hari Raya Korban taun tu.

Berebak enggau nya mega, bisi 20 iku raban ketuai komuniti, Chairman Masjid enggau Surau ari raban bansa Melayu di kawasan N.27 Simanggang mantaika sukung sida ngagai Harden di kawasan N.27 Simanggang.