Tuju langgur pekara nya dikena mutarka sekeda bidang ke patut diperati pengudah bepuluh taun dipegai BN
SIBU: Parti Keadilan Rakyat (PKR) Sarawak udah ngelancharka 18 Perkara (18-Point Roadmap) lemai kemari, dikena sida napi Pengawa Bepilih Kunsil Nengeri (PRN) ke deka datai.
Chairman PKR Sarawak, Baru Bian madah, tuju langgur pekara nya dikena mutarka sekeda bidang di Sarawak ke patut diperati pengudah bepuluh taun dipegai perintah Barisan Nasional (BN).
“Pengelemi enggau pengurang perintah diatu chukup nyata dipeda. Penyeranta, penadai perengkaguna asas, pemimit perengkaguna ba pelajar enggau pengerai, infrastruktur, jalai raya, betebangka kayu enggau mayuh agi ke bukai ngujungka Sarawak nyadi sebengkah nengeri ke pemadu seranta di Malaysia sekumbang 52 taun ke udah,” ku iya.
Kenu ku iya, pematut ngaduka ubah udah terang bendar dalam langgur pekara PKR nya dikena meri pengarap baru ungkup rayat Sarawak terus nyingkang ke mua.
“Sistem ke bisi diatu udah rusak lalu kami bisi jalai dikena mutar sereta ngemanahka iya.
“Sebagi ari kita nyangka setuju enggau nama utai ke disebut Kepala Menteri ngelama tu betul lalu kita patut meri awak ngagai iya.
“Taja pia, iya agi parti ke endang sebagi ari perintah BN, lalu mayuh penanggul kitai bepun ari polisi-polisi perintah BN sereta ulah pengari politik BN,” ku iya.
Nya alai, Baru nesau semua rayat Sarawak mansik 18 Perkara PKR Sarawak lalu bekunsi visyen ungkup Sarawak.
Kaban Kunsil Nengeri (ADUN) Ba’ Kelalan nya madah, tepulai ngagai rayat enti deka ngeringka semua rayat Malaysia lalu nganjung mesej ngagai perintah Malaysia madah sida (perintah) bepenanggul ngatur menua tu.
“UMNO enggau BN udah mujur bekuasa berindik ari sukung rayat ari Sarawak enggau Sabah,” ku iya seraya madah 18-Point Roadmap nya bisi mandangka pemendar PKR negika Sempekat 18 Perkara ba taun 1963 (18-Point Agreement 1963).
Udah nya, 18 Perkara tu mega nyengkaum hak ngatur menua, bibas megai pengarap, tanah, adil ba pekara ekonomi, infrastruktur enggau perengka pengangkut mensia mayuh, elekterik enggau ai, rumah, pelahar, pengerai enggau pengelantang pendiau.
Hak orang indu, nembiak, lumba, ngangkatka komuniti, rampa menua enggau kampung, betanam betupi enggau berikan, dagang temuai enggau main asal bela bisi dirintai dalam 18 Perkara tu.