Gerija Katolik Miri numbuhka komiti dikena mantu orang umang di kandang mengeri

0

MIRI: Gerija Katolik Miri udah numbuhka sebengkah komiti dikena mantu orang di kandang mengeri ditu ke umang.

Chairman komiti, Sidney Lau madah, batang tuju penumbuh komiti tu dikena mantu meri perengka guna ngagai raban orang ti kelalu umang sereta ngiga bantu belanja ari perintah enggau pemeri ari gerempung pengintu pengelantang pendiau.

“Komiti tu mega deka mantu anak ruang bilik ke balat umang ngambika sida ulih besekula sereta bulih kereja ke patut nengah chara nempa sida ngena pengelandik,” ku iya madah ditu kemari.

Nya alai, naka tu bisi 2,182 ruang bilik di Miri dirintaika entara ruang bilik ke umang, diau di Miri nadai karan enggau bekal ai.

“Batang tuju kami iya nya deka nulung sida tu kelebih agi anak sida ngasaika pengidup ke lebih menyana,” ku iya.

Sidney madah, dikena mungkal pengawa nya sida udah meri pemakai ngagai 21 buah ruang bilik ke umang diau enda jauh ari palan endur muai uras di Batu Satu kira tiga kali seminggu.

“Kami mega udah ngelala raban ruang bilik ke balat umang ba endur bukai iya nya enda jauh ari jematan Pujut 7 tang tu begunaka mayuh ungkus belanja.”

“Nya alai kami ngarapka mensia mayuh ulih gerah jari nyaup meri belanja dikena mantu raban sida tu,” ku iya.

Pemeri ulih dibayar nengah nama The Society For Miri urban Poor lalu anjung nuju P.O. Box 1665, 98008 Miri tauka diberi nengah akaun Maybank 561127203561. Penerang silik ulih digaga nengah emel ke [email protected].

Nangkan nya, orang ke nyadi komiti dalam komiti tu iua nya Sidney Lau (chairman), James Ho (sapit chairman), Mary Choo (sekretari), Peter Sia (tukang wang) udah kaban komiti bukai iya nya Rosie Chin Tiong, Fabian, Stephen Then, Polycarp Chin, Edward Bul enggau Ursula Wong.