Pengujung nampung berita ke bula nengah media rama nadai meri pangka positif tang semina ngenusah komuniti
MIRI: Pengelandik diri empu nyerenih penerang beguna amat kelebih agi bekaul enggau pengerembai arus media rama ke nadai beentara jam ke diatu.
Kaban Kunsil Nengeri (ADUN) Telang Usan Dennis Ngau Jok madah, tu begunaka sesiku orang berunding dua kali sebedau nampung berita tauka ngerembaika penerang nya sekalika amat tauka enda.
“Bejimat lebuh nampung penerang iya ke dipeda kitai nengah media rama, tu begunaka pemintar runding kitai berundingka pekara nya enggau manah sebedau kitai ngerembaika iya,” ku iya rambau Pengerami Makai Lemai Serakup Kayan Sarawak (PKS) malam ensana di sebengkah hotel ditu.
Kenu ku iya, pengawa ngerembaika penerang nya patut diserenih enggau manah dulu sebedau iya dibantaika nengah media rama.
“Kebuah pia, ulah ke salah nampung berita ke bula pengujung iya nadai meri pangka ke positif,” ku iya ke mega nyadi Presiden PKS.
Tambah mega, raban komuniti deka ngasaika penusah sereta ngujungka sida tu pambar ketegal pekara ke bansa nya.
Bekaul enggau komuniti Kayan, Dennis madahka deka mai nama komuniti nya aja enda ngenataika sebarang reti.
“Mai nama Kayan aja enda mai kita kini-kini enti sema nadai pengawa ke positif dalam diri kitai empu,” ku iya.
Iya mega nesau raban bansa Kayan deka terus begempung enggau pangan diri sereta mega enggau raban bansa Orang Ulu ke bukai dikena nentuka pemujur pengidup sida jemah ila kelebih agi dalam pengawa pemansang.
Seiti peluang ku iya enda datai begilik baka nya aja sereta iya meseti digiga sereta diguna enggau manah.
Bela bisi bejaku ba pengerami lemai nya iya nya Sapit Kepala Menteri Datuk Patinggi Tan Sri Alfred Jabu Numpang.
Bela bisi datai iya nya Kaban Parlimen Baram Anyi Ngau, Kaban Kunsil Menua Senator Datuk Lihan Jok, Residen Miri Antonio Kahti Galis, Raban Ketuai Komuniti Orang Ulu sereta bisi 700 iku raban ke bukai.