RAMI: Alexander (dua kiba) enggau Susan (tiga kiba) enggau bala bukai maya pengawa bebaris bebala mayuh.
Rayat menua tu udah bisi Hari Merdeka ke diintu ninting taun lalu enda ibuh kiruh ngatur gempuru nya
Dikarang Judan Bungap //
KANOWIT: Gempuru Bersih 4.0 ke dibai ngagai nengeri tu tau bendar ngeruga penemu rayat ti ngujungka penyarut tau nyadi ba menua tu.
Kaban Kunsil Nengeri (ADUN) Ngemah Alexander Vincent madah, menua tu ngena sistem demokrasi alai pengawa bepilih diatur dikena milih perintah tang ukai pengawa tauka program ti ngena chara pejal.
“Perintah nengeri ngemendarka pengawa sida tu laban menua tu menua demokrasi. Tang chara ke diayan sida enda mandangka menua kitai tu menua ti ngena sistem demokrasi.
“Nya alai, anang ngiruh diri enggau program baka tu,” ku iya.
Iya mantaika jaku tu maya bejadi Program Membara Solidariti Malaysia ba Sekolah Kebangsaan Nanga Tada di Skim Gempuru Nanga Tada ditu, ensana.
Pengerami tu diatur Opis Pekara Khas (JASA), Opis Menteri Komunikesyen enggau Multimedia enggau Gerempung Apai Indai enggau Pengajar (PIBG) SK Nanga Tada.
Alexander madah, rayat menua tu udah bisi Hari Merdeka ke diintu ninting taun lalu enda ibuh kiruh ngatur gempuru nya.
“Hari Merdeka udah chukup diintu kitai enda ibuh ngintu pengawa ke bukai baka program sida nya. Sida nyangka ngembuan tuju enda manah ngagai perintah menua kitai,” ku iya.
Ku iya, menua Malaysia diuan pupu raban bansa ti enda sebaka pengarap tang mengkang likun ketegal rayat bela nemu bebasaka sereta ngetanka kaul enggau pangan diri.
Pengelebih tu ku iya, nejuka mayuh orang bukai kepapas lalu deka meda menua tu charut sereta pambar.
“Tang taja penyampau tubuh kitai enda mayuh baka ba menua ke bukai tang kitai mengkang likun enti semua pupu raban bansa bebasaka pangan diri,” pia ku iya madah.
Berebak enggau tu mega Alexander muji pengawa ke diatur sehari nya laban rayat ba Nanga Tada mujur ngayanka penaluk ngagai menua tu.
“Reti iya kitai seati ngereja semua pengawa baikka pengawa nya lempung tauka berat. Ari ke begempung tu kitai deka mujur ba semua pengawa,” ku iya.
Alexander madah, pemujur ngintu Hari Merdeka patut diatur ninting taun ngambi ulih dichunto nembiak baru.
“Enti kitai lembau ngintu Hari Merdeka ila sida mega pan sebaka. Sida deka lembau tauka enggai kiruh ngintu hari besai tu enti kitai enda mai sida berengkah ari umur agi biak,” ku iya.