Tuesday, December 7

Semina nengah kerejasama kitai teulihka pemujur

0

Kitai deka napi macham penanggul enti nadai kaul sereta penegap gempung lebuh bejalaika pengawa

Dikarang Chris Bishop //

KUCHING: Raban Biro Indu Kampung Siol Batu (2015-2017) mujur ngatur pengawa beserumpu makai lemai ba sebengkah hotel ditu, malam ensanus.

Pengerami digulu Chairman Serakup Dayak Iban Sarawak (SADIA) pampang Kuching Datuk Paduka Dr Anthony Nait, SAO Pelilih Kuching Julius Scott Sapong, Pemanca (Iban) John Tambi, Pengulu Robin Jimbai, TR Kampung Siol Batu Jijah Simanggang sereta sekeda tuai rumah ari genturung pendiau ngelingi Kuching.

Bejaku rambau pengerami nya, Julius ngelalau Biro Indu ti betuaika Chairperson Nily Sambang meri kerejasama rat ngagai Komiti Pemansang enggau Pengelikun Genturung Pendiau (JKKK) Kampung Siol Batu.

Ku iya semina gempung rat entara kededua gerempung aja tau nentuka pemujur tetiap program ke diatur.

“Aku ngarap Biro Indu kita ditu ulih majakka kerejasama rat enggau JKKK Kampung Siol Batu ketegal penegap enggau pemaik pengawa JKKK mih, deka nentuka tiap kampung ulih nyapai pemujur.

“Enti kitai enda besaup ngereja pengawa, Biro Indu kita tentu ngasaika pemar napi sekeda penanggul. Anang enda ngemeratka kerejasama enggau pangan diri ngambika semua pengawa ke bepenanggul muntang diputar,” ku iya.

Dulu agi ari nya TR Jijah ke mega Penyanding Penemu biro nya madah, biro nya endang agi baru, ditumbuh ba bulan Mei 2015 tu tadi.

Entara tuju numbuhka biro tu ku Jijah iya nya ngambi tau bisi endur ngempuru raban orang indu di Siol Batu ditu.

“Nengah biro tu kitai ulih sama bela besaup enggau pangan diri lalu mutarka sebarang penanggul ke bisi ditapi,” ku Jijah.

Makai lemai malam nya dikerami enggau program belagu karaoke, chabut tiket benasit enggau lagu ari penyanyi ti dipelanja.