Dikarang Rengenyan Labang//
KUCHING: E-paper See Hua Group ti nyengkaum surat kabar Utusan Borneo, The Borneo Post, enggau surat kabar See Hua udah mujur dipenyadika, kemari.
E-paper nya udah dipenyadi Ketuai Pemesai Eksekutif red ONE Network Sdn. Bhd Farid Yunus, Ketuai Pemesai Dagang red ONE Network Sdn. Bhd, Ben Teh enggau General Menijer Operasyen The Borneo Post enggau Utusan Borneo, Phyllis Wong.
Farid,lebuh dikerandau pengarang berita pengudah bejadika e-paper nya madahka diri temegah ati laban ulih nempa kerejasama enggau See Hua Group dalam industri e-paper.
“Surat kabar raban See Hua Group kaban keterubah enggau kami bekerejasama di Sarawak.
“Kami (red ONE) milih See Hua Group laban bungkur kaul surat kabar tu ( Utusan Borneo, The Borneo Post enggau See Hua) besai amat, ukai semina di Borneo sereta Sarawak aja tang nyengkaum di Semenanjung Malaysia.
“Nambahka nya kami arap endar nengah kerejasama tu ulih ngerembaika agi nama red ONE sereta ‘bundle e-paper’ enggau ‘subscription’ mega,” ku Farid.
Kelimpah ari nya, lebuh ditanya bekaul enggau juluk red ONE begulai enggau See Hua Group dalam industri e-paper, iya madahka red ONE bisi juluk ti besai sereta ngarapka ulih tejapaika juluk 1 juta iku ‘subscriber’ manggai ujung taun tu.
“Juluk kami deka meri 20,000 akaun nadai bebayar dalam timpuh enam bulan berengkah 1 Oktober, lalu diatu red ONE udah bisi 700,000 iku ‘subscriber’ pascabayar.
“Tagit kami manggai ujung taun 2015 iya nya sejuta iku ‘subscriber’.
“Ngarapka nengah e-paper/phone bundle kami ulih matak mayuh agi pemacha, kerejasama enggau betukar data, nya mega ngambika See Hua Group ulih nambahka kaul enggau ‘subscriber’. Tambah mega diatu udah bisi stesyen radio baru iya nya TEA FM,” ku iya seraya ngarapka nengah kerejasama nya red ONE bulih penemu enggau peneleba ari ‘subscriber’ Sabah enggau Sarawak.
Mensia mayuh ti deka nemu pasal e-paper sereta red ONE tau meda ba website www.redONE.com.my.