KAPIT: Pengerami Hari Lumba Menua 2015 renggat sitak Parlimen P215 Kapit ke diatur bepalan ba Town Square ditu kemari udah dipenyadika Sapit Menteri Pemansang Menua Pesisir enggau Kandang Menua, Datuk Alexander Nanta Linggi lalu bisi digulu mayuh pupu raban bansa.
Sentara nya, pengerami ke sebaka bagi Sitak Parlimen P216 Ulu Rajang udah dipenyadika Sekretari Politik Kepala Menteri Sarawak, Wilson Nyabong Ijang iya ke ngarika Kaban Parlimen (MP), Datuk Wilson Ugak Kumbong bepalan ba Sekula Sekondari (SMK) Selirik.
Ba sitak Kunsil Nengeri (DUN) Katibas bepalan ba Bazaar Song, pengerami tu udah dipenyadika Kaban Kunsil Nengeri (ADUN) Katibas empu, Datuk Ambrose Blikau Enturan, lalu ba Belaga, Pemesai Pelilih, Abdul Halim ngarika Menteri Muda Main Asal enggau Adat Lama, LiwanLagang udah diatur ba Bazaar Belaga.
Nitih ku Pemesai Nembiak enggau Lumba Kapit, Jack Janda, madahka Hari Lumba Negara tu seiti ari inisiatif perintah dikena meransang rayat nitihka daya idup ke bepengerai seraya ngedut kaul enggau pangan diri.
Chairman pengatur pengerami nya, Mandal Residen Kapit, Zul Usup madahka Opis Pengerai begulai enggau Opis Nembiak enggau Lumba sereta bemacham ejesi perintah ditu udah ngatur program sehari iya ke disereta urung iya 24,000 iku pesereta iya ke nyengkaum 48 buah sekula sereta 40 buah Komiti Pemansang enggau Pengelikun Genturung Pendiau (JKKK) rumah panjai.
Bemacham aktiviti bisi diatur rambau program sehari nya baka program ‘Gegaran 10,000 Langkah’, besenam, Tanda Poco-Poco, Futsal, Badminton, Sukaneka, enggau mayuh agi ke bukai.
“Dikena nyapai juluk nya, kami ngadang bisi 10 peratus peranak Kapit ke datai ari mayuh macham ejensi perintah, gempung ukai dikuasa perintah (NGO), sekula enggau kelab enggau serakup ba kandang menua nya deka nyereta program ke diatur beserimbai enggau Hari Lumba Menua diatur ba serata menua,” ku Zul.
Ku iya aktiviti ‘Gegaran 10,000 Langkah’ nya seiti ari program ke chukup manah ke pengerai.
Pejalai dalam penyauh 6.2 kilometer (10,000 singkang) ba sepemanjai jalai ngelingi pasar Kapit sereta kandang endur ngelingi nya nitihka langkar ke udah diatur.
Ku iya nandu, atur program tu mega ulih meransang komuniti chakah agi ngereja pengawa nyengkaum ari bemacham ejensi perintah enggau raban NGO.
Bela bisi datai iya nya Pemesai Pengereja Pengawa, Anyie Awing, Pemesai Opis Pemansang Rama, Rata Tanggai, Pemesai Nembiak enggau Lumba Kapit, Jack Janda sereta raban polis.