MURAH ARI ENGGI BN: Leon (semilan ari kanan) begulai enggau kaban DAP bukai sereta peranak menua nya begambar ba atas jematan besi ke baru tembu.
Tu ngayanka perintah ke diatu enda landik ngatur belanja duit chukai ke digumpul ari rayat
KUCHING: Parti Tindakan Demokratik (DAP) Sarawak udah nembuka pengawa ngaga Jematan Besi Impian Sarawak ke meraka Batang Undup di Batu Lintang, semak Simanggang, ditu.
Projek jematan peningi 100 kaki tu inisiatif ari peminta peranak ba genturung Sungai Tanduk, ku Mandal Chairman DAP Sarawak, Leon Jimat Donald.
Leon mega madah, peranak menua nya lama udah minta jematan nya tang enda dikeibuhka kaban kunsil nengeri (ADUN) ke dipilih, tang DAP Sarawak mujur ngasuh peminta sida nya nyadi nyata pengudah belanja ungkup pengawa nya ulih digiga nengah inisiatif parti Impian Sarawak.
Iya mega madah, jematan tu digaga nengah ungkus RM55,000 lalu tu jauh murah ari perambu belanja penyampau RM260,000 dikena Perintah Barisan Nasional (BN) ngaga jematan gantung di kandang menua Batu Lintang.
“Nya kebuah kami ari DAP minta ngagai rayat ngundi kami ngambika ulih megai kuasa nyadi Perintah Nengeri tu ila laban BN diatu enda landik ngurus belanja ngena duit chukai ari rayat enggau manah tauka lurus.
“Nama kebuah Impian Sarawak ulih ngaga jematan besi ngena ungkus murah ari BN ngaga jematan sida? BN enda landik nguruska pekara belanja rayat, duit ke dibayar kitai nengah chukai barang enggau servis (GST) dibasau ngapa kena nulung kroni sida. Ulah ti baka tu patut diketuka lalu semina nengah pengawa milih perintah ti diketuaika DAP aja ulih ngatur pekara belanja ari duit chukai rayat dipejalaika enggau manah,” ku Leon.
Leon, ke mega Ketuai DAP Sri Aman nambah, seiku peranak menua nya ke benama Tinin Anyan udah manah ati nyerahka sebagi ari tanah iya empu ngambika ulih endur nirika jematan besi meraka sungai nengah tanah iya.
Leon mega madah, bepelasarka komplin ari peranak menua nya, sekeda sida ari BN suah besemaya deka ngaga jematan gantung meraka Batang Undup tiap kali maya pengawa bepilih tang naka ke diatu nadai kala dikeamatka.
“Tanah sida ke di seberai Batang Undup tu meruan puang lalu tebal agi orang ke ngempu tanah nya mutuska diri enda nyereta sebarang skim pemansang tanah ari ejensi perintah. Sida rindu agi numbuhka kebun sawit diri tang tejanggal laban nadai jematan dikena nyemerai maya deka ngereja pengawa, sida teperasa ninga semaya BN,” ku Leon.
Berebak enggau nya, pengerami bejadika jematan tu mega bisi digulu Ketuai Dayak DAP ari Ngemah, Machan, Kemena enggau Samalaju.