KE PENGINGAT: Henry Nuni (di tengah) begambar enggau raban SDNU Kemena sereta peranak rumah panjai sepenembu program nya.
BINTULU: Sarawak Dayak National Union (SDNU) Kemena udah ngatur Kimpin Nyeliahka Penusah Angus di Rumah Tabor Lasah, ti dipejalaika ba laman rumah panjai nya apin lama ke udah.
Ku Kordinator Program Tuai Rumah Henry Nuni Plen, SDNU Kemena ngemeratka pengelikun ba rumah panjai ke lebih agi penusah angus.
Ku iya, ketegal penyiru nya SDNU Kemena bekerejasama enggau Opis Pengerara Api enggau Penyah Penusah (Bomba) Bintulu nyengkaum sekeda ejensi bukai enda ngetu ngatur program nitihka pinta.
“Ketegal nemu pasal penyampau kes angus ti nyadi ba rumah panjai majak nambah di Bagi Menua nya, SDNU nyendiaka sida napi penusah nya nengah chara meri licha sentang chara nyeliahka penusah angus,” ku iya.
Berebak enggau nya ku iya, semua mensia mayuh ke lebih agi peranak rumah panjai patut seruran bejejaga nyeliahka penusah nya nyadi.
Nya alai, SDNU Kemena deka ngemajakka program ke baka nya belama dikera ngiri mensia mayuh enggau penemu pasal nyeliahka penusah angus.
“Aku arapka kimpin nyeliahka penusah angus tu ulih ngajar mensia mayuh sentang chara ngena perengka ngeeara api nitihka gaya penusah ke nyadi ,’’ ku iya.
Nengah awak nya, SDNU Kemena lalu meri perengka dikena ngerara api ngagai peranak rumah panjai nya.
Bela bisi datai, Sekreteri SDNU Pampang Kemena, Cenilla Anthony Assan.