Betanam kulat meri untung besai ngagai Bibi

0

Dikarang Judan Bungap//

ASIL PENGELELAK lima taun betanamka kulat lenyau dalam beberapa minit aja lalu enda matahka pengeransing Bibi Dana nandu pengawa iya nyentuk ke mujur baka ke dipeda sehari tu.

Kena pagi bulan September taun 2013, sida serumah ba Rumah Dana, Bukit Penyau, Salim, Sibu begau tepedaka api benung nyerarai makai rumah panjai sida, urung pukul 8.48 pagi.

Rumah panjai angus lengis, kulat ke ditanam Bibi ke diengkah ba baruh rumah bela angus magang maya nya.

“Maya nya aku baru mindahka kira bisi 5,000 iti beg kulat ari rumah alai nerenak kulat nya.

“Iya ke ditinggal ba rumah alai nerenak nya semina kulat ti enda tentu manah aja.

“Tang semua pekara ke nyadi tu enda ngasuh aku mantul betanamka kulat baru,” pia ku iya maya berandau enggau pengarang berita, empai lama tu tadi.

Udah ke angus nya iya berengkah baru nanam kulat lalu belabuh mujur baru ari taun 2014 nyentuk iya diatu bisi lebih 30,000 iti beg kulat bansa ‘Cendawan Tiram Kelabu’.

Ngenang pun pengerindu iya nanam kulat, ku Bibi, iya mutus deka ngalih ari pengawa nyadi pengajar sebedau mekuhka pengawa nanam kulat nya.

“Ujung taun 2008, ngena puku RM10,000 aku nanam kulat urung 3,000 iti beg ba baruh rumah.

“Pengawa aku tu bisi disaup Opis Betanam Betupi alai sida meri puku RM20,000 lalu dikena aku ngaga rumah alai nanam kulat enggau injin ba taun 2010.

“Udah nya ba taun 2013, aku mega bisi nerima saup ari program nengah Opis Kepala Menteri baka bantu kereban,” ku ngerintai pengawa iya.

Diatu Bibi disaup laki iya mujur nyual kulat nya lebih 300 kilogram sebulan enggau asil urung RM7,000 ngagai RM8,000.

Iya madah, sebungkus kulat nya dijual RM2.50 (130 gram) lalu suah agi dijual iya ngagai Supermakit Farley di Sibu tauka di Mukah.

Naka ke diatu ku iya, iya nadai penanggul nyual kulat nya pungka laku agi maya ujung minggu tauka musin hari besai.

Bekunsika penemu nanam kulat, Bibi madahka abuk kayu (suah agi dikena kayu getah) disimpan dalam beg media lalu diangat dalam kandang 12 jam ba pengangat lebih ari 100 degree tang enda ngelui 120 degree.

Iya madah, pengawa tu dikena munuh kuman sebedau leka kulat diterenak.

“Maya ke nerenak leka nya dalam beg media kitai ukai semina beresi tang palan nya mega enda tau enda diberesi dulu tauka dituchi ngena deltol.

“Udah pengawa nya tembu beg media alai nerenakka kulat nya deka disimpan ba endur ti chelap,” ku iya nerang.

Ku Bibi, seiti beg nya deka ngeluarka asil dalam kandang sebulan setengah lalu ulih ngeluarka asil nyentuk semilan kali.

Iya mega madah, iya suah agi ngena abuk kayu getah ari abuk kayu bukai ti enda tentu manah ngeluarka asil.

Ku iya, iya bisi ngaji sida serumah ngiga kayu getah ti diinjin iya empu dikena ngaga abuk sebedau disimpan dalam beg media.

Diatu Bibi bisi tiga iti rumah alai nanam kulat nya lalu tiap bengkah rumah nya deka diintu enggau likun ngambika enda kelalu angat ti tau ngasuh kulat enggau mayuh tumbuh.

Kelimpah ari nya, iya madah, enti enda diintu enggau likun kulat tu mega deka sakit ketegal indu utai.

“Leka kulat tu enggau tudung dikena nutup beg diambi ari Kuala Lumpur.

“Beg media agi ulih dibeli ba kilang di Sibu ditu empu,” pia ku iya sambil madah mensia mayuh mega tau meli beg ke udah diternak leka ba iya ditu.

Kelimpah nyual kulat, Bibi mega bisi ngatur kus chara nanam kulat, nyual abuk kayu (getah), leka kulat, beg media enggau tudung beg media.

Iya madah, sida ke datai ngulu kus ke diatur iya nya deka diberi setipikit, bup chara nanam, diskaun meli barang dia nyengkaum pemakai bela bisi disediaka maya nya.

“Kus tu enda suah diatur iya nya kira setaun sekali.

“Kus nerenak kulat tu bisi diatur kena 27 March 2016. Bayar nyereta kus iya nya RM300 ungkup seiku.

“Barang sapa ke deka ngulu kus tu ila tau betelefon ngagai aku nengah lumur 017-845 6561,” ku iya ngujungka randau.