KUCHING: Sarawak disadang nadai betapi enggau penusah bah besai baka ti disebut sebedau tu.
Menteri Pengeraja Asal enggau Rampa Menua Datuk Seri Wan Junaidi Tuanku Jaafar madahka, penyadi bah di nengeri tu bepun ari bah tunggal sereta ukai ketegal penyadi Monsun Timur Laut tauka musin pengujan.
“Pekara ke dipelabaka kitai sebedau tu iya nya ti madahka Sarawak deka betapi enggau bah besai, pekara nya nadai nyadi.
“Aku empu udah ngabas kandang endur ti bisi kena bah di mengeri Kuching lalu semua ai nya udah surut, nya alai pekara tu udah nyata tambah mega pengudah ninga licha ari (Direktor Opis Entali Ai enggau Parit (JPS) Sarawak, Chok Moi Soon), bah ke nyadi di mengeri tu ukai ketegal penyadi monsun tang ketegal bah tunggal.
“Bah tunggal ke nyadi baka di mengeri Kuching ketegal ari sistem parit ti enda ulih tetimbunka pemayuh ai ujan ti nyegang ari laut tauka sungai,” ku iya.
Kaban Parlimen Santubong nya mansutka pekara nya ba sebengkah aum pengarang berita pengudah ningaka licha ari Opis Entali Ai enggau Parit ba opis nya empu, kemari.
Ngenang pekara nya baru iya madahka pemansang ti benung nyegang di mengeri tu lalu sistem parit ti enda tentu meruan sereta mayuh nakung ai endang nyadi kebuah bah tunggal nyadi.
“Bah ke nyadi di mengeri tu mega ukai ketegal ai pasang besai laban pasang besai udah nyadi urung 25, 26, 27 haribulan (Disember) tu tadi.
“Kandang endur ke mayuh nerima ai ujan tauka balat ujan semina di menua Batang Lupar, kandang pesisir Sri Aman nyentuk ke Kuching enggau kandang menua Lundu. Nya alai ukai ketegal penyadi Monsun tang ketegal bah tunggal,” ku iya.
Nambahka nya iya madahka, kandang endur ti baruh baka rumah ke digaga ba kandang endur ke baruh mega mudah kena bah tunggal lalu ukai ketegal penyadi musim pengujan.
Sama bisi dalam aum pengrang berita kemari, Chok, Deputy Director General II JPS Malaysia Dato Ir. Zulkefli Hassan enggau Pemesai Khas Kanan ngagai Mentei Pengeraja asal enggau Rampa Menua Datuk Mohd Amim A.Wahab.