KUCHING: Gerempung Ukai Dikuasa Perintah (NGO) patut bisi inisiatif ngumpul belanja kediri empu lalu ukai semina bepanggai ba saup perintah aja.
Menteri Pemansang Rama, Tan Sri William Mawan Ikom madah, perintah ba senentang belanja endang bebendar nguji mantu NGO di nengeri tu tang enti ngarapka perintah aja tentu enda chukup dikena bejalaika aktiviti sepemanjai taun.
“Aku ulih meretika nya ukai pekara muntang ba sesebengkah gerempung ti nadai ngemeratka untung ngatur aktiviti laban nya begunaka belanja besai dikena mantu kaban sereta orang ke begunaka saup.
“Perintah nengah opis menteri aku enggau naka ulih meri ungkup belanja tang berebak enggau tu mega sesebengkah gerempung patut bisi inisiatif ngiga belanja kediri sekalika nengah pengari rayat tauka jalai bukai,” ku iya.
Iya mansutka pekata nya ba atur pengawa nyuaka geran sepenyampau RM150,000 ngagai sekeda NGO diatur ba opis iya di Kompleks Baitulmakmur, Petra Jaya ditu, empai lama ke udah.
NGO ke nerima geran nya, Persatuan Veteran ATM Sarawak; Anglican Worship Centre Taman Sri Permai RPR Landeh; Kelab Sukan dan Rekreasi Punan Kuching; Kelab Rekreasi Kampung Senari; Persatuan Veteran Renjer Sarawak enggau Rukun Tetangga Taman Banjaran Serapi Matang.
Kelimpah ari nya, Tukang Wang Persatuan Veteran ATM Sarawak Mohd Henderi Hashim lebuh dirandai madah, geran ti diterima nya sebagi ari ungkup belanja ti disemayaka perintah nengeri maya Majlis Makan Malam Kutipan Dana Pahlawan ditu bulan Ogos taun nyin kemari.
“Kami temegah sereta ngenataika pengaga ati ngagai perintah nengeri sereta lebih agi Mawan laban udah ngemendarka RM100,000 ngagai gerempung kami,” ku iya seraya madahka Persatuan Vetaran ATM Sarawak udah nerima RM50,000 kemari lalu bayar ti kedua deka diberi ba hari bukai.