Ketuai komuniti sereta peranak menua dia bela setuju minta iya nyadi pengari rayat maya PRN11 tu ila
// Dikarang W B Ongie //
MARUDI: Raban ketuai bansa Orang Ulu di Sitak Kunsil Nengeri (DUN) Telang Usan mantaika sukung penuh enda bebagi ngagai pengari rayat sida, Dennis Ngau sereta besemaya ngeringka iya rambau Pengawa Bepilih Besai Nengeri ti Ke-11 (PRN11) tu ila.
Pia mega, raban ketuai komuniti mega ngaku Dennis tu taja baru sepenggal nyadi Kaban Kunsil Nengeri (ADUN) Telang Usan, tang iya udah nganyanka pemanah pengawa dikereja ti balat ngasuh bansa Orang Ulu temegah ati seraya ngembuan kaul rat enggau rayat.
“Iya udah mujur bejalaika tanggungpengawa enggau manah di Ulu Baram ke ngelama tu enda kala dikereja pengari rayat dulu agi ari iya,” ku sida.
Rambau ke dirandau raban pemberita ba Tumpuk Pendiau Penan di Long Latei, kandang menua Apoh, apin lama ke udah, Pengulu Ajang Wan ari Long Liam dalam kandang menua San, sekeda orang ke bisi mantaika diri nyukung Dennis.
“Chukup manah, laban iya tu agi biak sereta ngembuan runding deka ngemansangka komuniti di Ulu Baram lalu aku meda nadai kebuah kami, raban bansa Orang Ulu nulak iya, tambah mega iya tu seiku pengari rayat ti chukup bagas gawa,” ku Ajang.
Bela bekunsika penemu ke sama sereta ngarapka Dennis tu meruan di Telang Usan iya nya Pengulu Mering Ibau, Pengulu Ajang Kiew (Penan); Pengulu Herbert Lawai Epoi (Berawan), Temenggong Elizabeth Deng enggau Pemancha Gilbert Ding Laing, seiku ketuai komuniti Kayan ari Uma Beluvuh, Long Panai.
Berebak enggau nya, Ajang mega minta semua nembiak redak iya enggau komuniti Orang Ulu di Telang Usan begempung sereta bediri tegap nyukung Dennis nyadi chalun Barisan Nasional (BN) maya Pengawa Bepilih Besai Nengeri ti Ke-11 (PRN11) tu ila, lalu mulaika baru mandat ngagai BN ba kandang menua nya dikena nentuka pemansang terus dipejalai.