KUCHING: Gerempung Dayak Iban Sarawak (SADIA) Pampang Kuching meri sukung ti penuh ngagai Perintah Nengeri ke ari baruh iring Kepala Menteri Datuk Patinggi Tan Sri Adenan Satem ti mega Chairman Barisan Nasional (BN) Nengeri.
Sukung nya dikenataika Chairman SADIA Pampang Kuching, Datuk Dr Anthony Nait ngarika kaban gerempung ke ari baruh pegai iya ba sebengkah pengerami mit nyambut Taun Baru 2016 apin lama udah.
“Kenyau Adenan ngiring nengeri tu ny adi Kepala Menteri mayuh ubah udah digaga iya ke pemaik rayat kelebih agi ngagai sida ti nguan menua pesisir enggau ulu sungai di Sarawak.
“Nya alai, kami dalam SADIA kelebih agi pampang Kuching deka meri sukung ti penuh ngagai Kepala Menteri ngambika ulih mai pemaik enggau pengelantang ngagai rayat sereta nengeri tu,” ku iya.
Ba pengerami nya, Anthony mega ngelalau kaban gerempung ti ari baruh kemata iya kelebih agi ti megai tanggungpengawa nyadi apai indaingambika ngemerat pekara pelajar ba anak sida.
“Apai indai enda tau enda bereatka pelajar anak sida laban pelajar mih ti nyadi reta ke pemadu beguna dikena nentuka gaya pengidup sida jemah ila,” ku iya.
Pengerami nya udah diatur ba rumah sapit chairman, Peter Moni di Taman Heng Guan, Matang ditu ke sama digulu Datin Laceylona ti mega bini Anthony.
Sma bisi ngulu pengerami nya Penghulu Jonathan Jelai, Penghulu Robin Jimbai, Tr Sangi, Tr Lia, Tr Jijah, Tr Robert Dino, Philip Sempurai enggau bala bukai.
Kelimpah ari ti makai seraya berandau enggau pangan diri, sida mega beperindang enggau tanda poco-poco sereta belagu karaoke.