KUCHING: Hari Bioekonomi ti diintu Opis Menteri Sains, Teknologi enggau Inovasi (MOSTI) di Kuching kemari dikearap ulih ngangkat industri bepelasarka projek bio di nengeri tu.
Menteri MOSTI Datuk Seri Panglima Madius Tangau madah, projek nya deka disengkaum dalam Program Ubah Bioekonomi (BTP) enggau Program Pemansang Bioekonomi Komuniti (BCDP).
“Kitai diatu deka ngangkatka kompeni ari Sarawak ti bisi kaul enggau industri bepelasarka bioekonomi lalu nempa projek BTP sereta BCDP ke baru.
“Juluk tu deka ngenegap industri bioekonomi di Sarawak sereta ngerembaika ekonomi nengeri seraris enggau Atur Pemansang Malaysia Lumpar ke-11,”ku iya.
Panglima Madius mansutka penerang tu ba jaku pengelalu pengerami ti dipenyadi Sapit Kepala Menteri Datuk Patinggi Tan Sri Alfred Jabu ti ngarika Kepala Menteri.
Iya nambah, industri bioekonomi nyendiaka markit baru lalu bisi peluang dikerembai ke alai pengaya pengeraja asal ke dikembuan Sarawak nyadi seiti pengelebih.
“Ketegal pengelebih nya sereta ditambah enggau gaya rampa menua ke manah, Sarawak ulih nyadi kuasa besai ba bioekonomi,’ku iya.
CEO BioTechCorp Dato Dr Mohd Nazlee Kamal ba aum pengarang berita udah nya madah, entara projek ke deka dipun di nengeri tu iya nya projek akuakultur ke bekait enggau pengawa nupi undang galah.
Ku iya teknologi ngemansang projek undang nya sigi udah bisi lalu projek ngemansang pengawa nupi manyi sereta ngerembaika dagang buah dabai mega deka diadu.
Ba pengerami nya, Ronser Bio-Tech Berhad nengah tusun tanggungpengawa rama (CSR) meri projek Sistem Meresi Ai ungkup 120 pintu peranak di Uma Juman, Bintulu.