Dikarang Chris Bishop//
MENTAS: Mawan (tengah) ngelantangka diri begulai enggau raban media.
KUCHING: Parti Tenaga Rakyat Sarawak (TERAS) keran ngangkatka komitmen lalu nentuka parti ba penuduk ti tegap ngambi tau nyapai juluk ti ditetap ketuai dalam gempung perintah.
Presiden Tan Sri William Mawan madah dalam konteks Barisan Nasional(BN),parti deka meri kerejasama rat, ngembuan tuju ke sama kelebih agi dikena napi pengawa bepilih ti disadang diadu ba ujung bulan Mac tu.
Netapka TERAS megai tanggungpengawa berat sereta diarika empat iku menteri kanan enggau menteri muda, Mawan keran ngembing parti nempa pemujur ke besai agi.
“Fokus kitai patut ngemeratka pengawa ngenegap penyerakup, pengelantang sereta matak mayuh agi sukung ungkup BN.
“Pemujur ba pekara tu deka nyendiaka pemaik ngagai Kepala Menteri Datuk Patinggi Tan Sri Adenan Satem pia mega parti dalam serakup BN ngambi teulihka mandat besai ba pengawa bepilih ti deka datai,’ku iya.
Mawan mansutka jaku tu ba pengerami TERAS Begulai enggau Media di sebuah hotel ditu, malam ensanus.
Dikena nentuka BN ulih napi semua pemar ke bisi nujah, Mawan pechaya semua bida runding enggau penemu entara kaban dalam parti lalu pia mega entara kaban ba parti bukai patut diputar enggau manah.
Iya ke mega Menteri Kanan enggau Menteri Pemansang Rama madah,nadai penanggul ke enda ulih diputar lalu semua nya sigi ungkup pemaik BN.
“Ke pemadu berat,penanggul dalam gempung perintah tu patut enda ngalahka pangku pengawa ketuai dalam perintah BN ba atur nyapai juluk ke udah ditetap,’ku iya.
“Nadai penanggul politik ke besai ti enda ulih diputar. Pekara ke dikenangi kitai iya nya pengeran sekeda orang ti ngembuan juluk diri empu.
“Nengah embing Chairman BN Nengeri kitai patut ngambi inisiatif, ngenataika pesan ngagai orang tauka raban ti ngembuan ulah baka nya ngambi sida dulu ngemeratka pemaik BN ari ti nyapai juluk diri empu,”ku Mawan nandu.
Pengerami TERAS Begulai enggau Media malam nya digulu urung 200 iku raban media chelak enggau elektronik.
Bela datai Sapit Presiden ke mega Menteri Muda Pemansang Industri Datuk Peter Nansian, Sekretari Besai ke mega Menteri Muda Betanam Betupi Datuk Sylvester Entri, Mandal Presiden (Senior) ke mega Menteri Muda Pemansang Ruang Bilik enggau Pelajar Tumu Anak Mit Rosey Yunus, Sapit Sekretari Banyi Beriak,Tukang Wang Besai Paulus Palu Ngumbang, Ketuai Pemadah Sim Hang Seng enggau sapit iya Churchill Edward Drem sereta orang bukai.