Tuesday, November 12

Chalun terus BN deka diguna maya PRN11

0
KOMITI NEMBIAK PBB: Adenan, Jabu enggau Awang Tengah begambar begulai enggau raban nembiak PBB rambau program di Santubong kemari.

KOMITI NEMBIAK PBB: Adenan, Jabu enggau Awang Tengah begambar begulai enggau raban nembiak PBB rambau program di Santubong kemari.

Adenan melabaka jalai nya tau diperunding enti nya ulih dikena mutarka penanggul pasal penuduk

Dikarang Chris Bishop //

SANTUBONG: Kepala Menteri Datuk Patinggi Tan Sri Adenan Satem melabaka chalun terus Barisan Nasional (BN) deka diguna rambau pengawa Bepilih Besai Nengeri ke-11 (PRN11) tu ila.

Iya ke mega Chairman BN Nengeri madah pekara tu tau diperunding enti jalai nya ulih mutarka penanggul ba sentang agih penuduk ngagai parti dalam serakup BN.

“Kitai udah kala nguna formula ke baka tu ba pegawa bepilih ke udah iya nya ba Datuk Seri James Dawos Mamit enggau Datuk Billy Abit.

“Taja pia, formula tu semina diguna ba parti ke napi penanggul lalu enda nyengkaum Parti Pesaka Bumiputera Bersatu (PBB) enggau Parti Rakyat Sarawak (PRS),” ku iya.

Iya mansutka jaku nya ba sebengkah aum pengarang berita pengudah bejadi Program “Training of Trainers (T.O.T)” Raban Nembiak PBB sereta ngelanchar Komiti Nembiak PBB Sarawak kemari.

Nyaut tanya pemberita sentang chalun ti ngarika BN Nengeri, Adenan madah majoriti sida udah diputus kelebih agi ungkup PBB enggau PRS.

PBB enggau PRS ku Adenan ke mega Presiden PBB deka bediri ba 40 enggau 11 penuduk Kunsil Nengeri (DUN).

“Ari 11 penuduk baru, PBB deka bulih 5 lalu laluh enam dibagi nengah formula 2, 2, 2,”ku iya nambah.

Program TOT diadu tiga hari berunggu berengkah 12 nyentuk 14 Februari di Century Santubong Beach Resort ditu lalu digulu raban nembiak ari semua pampang.

Bela datai Sapit Presiden PBB Datuk Patinggi Tan Sri Alfred Jabu Numpang, Sekretari Besai PBB Datuk Dr Stephen Rundi Utom, Ketuai Nembiak PBB Dato Seri Fadillah Yusuf, Mandal Presiden Kanan PBB Datuk Seri Douglas Uggah sereta Datuk Amar Awang Tengah Ali Hassan.