Ngambika rayat di menua pesisir ulih ngasai kualiti pengidup ti manah sereta meruan agi
// Dikarang Rengenyan Labang //
ADENAN
KUCHING: Kepala Menteri Datuk Patinggi Tan Sri Adenan Satem madahka pemansang menua pesisir nyadi pekara ti pemadu dikemeratka perintah nengeri.
Iya madah, nya ngambika peranak menua pesisir ulih sama ngasaika pengelantang enggau pengidup ti bekualiti, sebaka enggau peranak mengeri.
“Taja pan mengeri tu udah mansang, kitai enda tau enda ingatka bala pangan kitai ba menua pesisir ti begunaka agi mayuh bantu dikena ngemansangka pengidup sida.
“Perintah udah bejalaika Program Transformesyen Menua Pesisir dikena nyendiaka mayuh agi perengka guna di menua pesisir ti lalu dikena ngangkatka agi kualiti pengidup peranak menua pesisir.
“Rayat kitai di menua pesisir mega patut ngasaika pengidup ti meruan agi baka sida ke diau di mengeri,” ku iya.
Pekara nya dipansutka Adenan ba teks jaku iya ti dibacha Menteri Kunsil Kandang Menua enggau Pemansang Raban Bansa, Dato Sri Wong Soon Koh ti ngarika iya ngulu ‘Majlis Ramah Tamah Tahun Baru Cina 2016’, ke diatur Majlis Bandaraya Kuching Selatan ba tengah laman Balai Mensia Mayuh, Jalai Padungan ditu, kemari.
Nambahka nya ku iya, kitai ulih meda transformesyen mengeri Kuching ti jampat, kelebih agi ba pengawa nempa mengeri Kuching nyadi mengeri ti manah dipeda.
“Nengah sukung enggau saup rayat, kitai ulih nyendia mayuh agi perengka guna ti kondusif dikena nyaga rampa menua ti nyamai endur diau sereta ngerembaika agi pemansang raban bansa,” ku Adenan.
Berebak enggau tu iya madahka pengaga ati diri meda MBKS udah mansang nengah mayuh bengkah inisiatif ke ulih meransang mensia mayuh beserakup nyadi seiti setipak enggau status ‘City of Unity’ enggau program ke bukai.
Kelimpah ari nya, Datuk Bandar Kuching Selatan Dato James Chan Khay Syn ti ngenang pengerami nya dalam jaku pengelalu iya madah, Chap Goh Mei endang pengerami bansa China ti bekaul enggau Taun Baru China, tang sama dikerami rayat Malaysia.
“Tu mih chara kitai berami di Kuching, chara ngemansangka agi kaul, pemereti ati sereta penyerakup entara mensia mayuh ngambika nyadi rayat Malaysia ti tulin.
“Pengerami ti baka tu ulih nyeremin mengeri Kuching ti mega dikelala ‘City of Unity’,” ku Chan.
Pengerami nya kemari digulu pengabang ti pemadu dipebasa Sapit Menteri Besai Datuk Seri Dr. Ahmad Zahid Hamidi, Sapit Menteri Dalam Nengeri Masir Kujat enggau pemesai ke bukai nyengkaum mensia mayuh.