Pilih mih pengari rayat BN di DUN Meradong

0

KM ngelalau rayat ditu nyukung BN ngambika sida nadai agi tinggal pemansang

BINTANGOR: Segenteran jaku ngayanka sebana rayat di sitak Kunsil Nengeri (DUN) Meradong, ke udah lama nadai ngasaika pemansang sekumbang penuduk nya diarika DAP berengkah 2006, ngait ati Kepala Menteri Datuk Patinggi Tan Sri Adenan Satem.

“Kami di Meradong Nadai Apai..Nadai Indai Tok Nan.

‘Tolong Kami… Kami Mahu BN di sini!!”, munyi nya ku genteran jaku ke ditulis ba kain rentang di Stadium Bola Keranjang Bintangor balat narit ati Adenan maya ngulu Program Perintah Begulai Enggau Rayat ditu, kemari.

“Perintah enda ulih mantu kita (penuh) semadi mih pengari rayat kita ditu endang ari Barisan Nasional (BN),” ku Adenan.

Nya alai, iya minta pengundi di sitak nya terus nyukung dikena nentuka chalun BN menang maya Pengawa Bepilih Besai Nengeri (PRN) Ke-11 enda lama agi ngambika sida nadai agi tinggal ba sentang pemansang.

“Aku deka nentuka, pengari rayat BN ke dipilih kita ila ulih gawa bebendar ke kita.

Enti enda, aku empu nekung pala iya,” ku iya.

Adenan ke mega nyadi Chairman BN Sarawak, madah pengundi Bumiputera di Meradong taja sida semina ngembuan 40 peratus aja, sida agi ulih nentuka alah tauka menang chalun Bn di sitak tu nyema sida seati.

Ngenang pekara bukai, iya mega meri jamin perintah nengeri deka terus ngetanka timpuh chukai tanah taja iya betukar status tauka dibagi ngagai sub lot.

“Nyema tanah besai nya ngembuan timpuh chukai pengelama 99 taun, pengudah iya betukar status tauka dibagi ngagai lot-lot mit, timpuh chukai tetap mengkang sama pengelama 99 taun.

Nadai dikurang ngagai 66 taun baka ngelama tu,” ku iya.

Iya mega madah penemu ke udah dipesetuju perintah nengeri ke deka ngaga jalai ari pasar Bintangor ke Jalai Tanjung Manis dipeda ulih nyungkak pemansang Koridor Kuasa Ulih Dikena Baru Sarawak, tang sida ditangkan ngambika enda saru ngumbai pekara nya ulih tembu tekala nya.  — Bernama