Tulak politik pemenchi ti dibai penyakal, ku Najib

0

Penyakal sengaja nempa politik pemenchi dikena ngemba mensia mayuh ngambika bisi penangi ba politik

IDUP BN: Najib (tengah) enggau bini iya Datin Seri Rosmah Mansor manjungka slogan ‘Idup BN’ ba Pengerami Ketuai Begulai Enggau Rayat di Eastwood Valley, Miri, kena Hari Lima tu tadi. Sama bisi ngulu pengerami nya Adenan (lima kiba). — Gambar Bernama

IDUP BN: Najib (tengah) enggau bini iya Datin Seri Rosmah Mansor manjungka slogan ‘Idup BN’ ba Pengerami Ketuai Begulai Enggau Rayat di Eastwood Valley, Miri, kena Hari Lima tu tadi. Sama bisi ngulu pengerami nya Adenan (lima kiba). — Gambar Bernama

MIRI: Menteri Besai Datuk Seri Najib Razak ngelalau rayat Sarawak nulak politik pemenchi ti dibai penyakal ke nengeri tu.

Ku iya, penyakal sengaja ngirit rayat di nengeri tu ngagai politik pemenchi dikena nempa ‘political fear’ tauka penangi politik ba mensia mayuh.

“Kitai enda ulih diduruk enggau politik ti deka diterenak penyakal nya. Sida ngena sebarang aja isu ke sengaja ‘ditempa’ kelebih agi nengah media sosial enggau jaku sida,” ku iya.

Iya bejaku munyi tu ba Pengerami Ketuai Begulai enggau Rayat di Eastwood Valley Golf & Country Club ditu kena malam Hari Lima tu tadi, ti digulu urung 5,000 iku.

Bela bisi datai bini iya Datin Seri Rosmah Mansor, Kepala Menteri Sarawak Tan Sri Adenan Satem ke disempulang bini iya, Puan Sri Jamilah Anu enggau Sapit Kepala Menteri Sarawak, Datuk Patinggi Tan Sri Alfred Jabu Numpang nyengkaum dif-dif ke dipebasa bukai.

Ku Najib, baru tu Chairman DAP Sarawak Chong Chieng Jen nuduh kenu ku perintah Barisan Nasional (BN) deka nikika Chukai Barang Enggau Servis (GST) sepenyampau 10 peratus nyema BN menang ba PRN-11 ila.

“Ditu aku deka madahka nya siti pemula besai, perintah nadai kala sesekali nguji nikika penyampau GST, ukai semina di Sarawak tang di serata Malaysia. Anang madah 10 peratus, satu peratus pan enda deka ditiki.

“Kitai mengkang ngetanka penyampau GST ke diatu. Tu komitmen perintah lalu aku ke nyadi Menteri Wang ngenukuka pekara tu, ba bajet ke deka datai kami enda nikika GST taja pan ekonomi menua bisi pengusut ketegal rega minyak global nurun rega,” ku iya.

Ketuai lumur satu menua nya mega nambah, penyakal sengaja ngemba rayat dikena ngulihka sukung sereta nempa politik pemenchi.

Dulu ari nya, Tan Sri Adenan Satem lebuh ke bejaku madah, iya muji Najib ti sayau sereta berat agi ke hal ehwal Sarawak.

“Entara enam iku Menteri Besai kitai ke udah, Najib sayau sereta ibuh agi ke nengeri Sarawak.

“Kelimpah ari nya, dalam timpuh enam taun tu, iya udah 49 kali nemuai ke serata menua Sarawak lalu ukai semina nemuai mai jari puang,” ku iya.

Ku Adenan, Najib seruran meri ke pemadu manah ngagai rayat ditu.

Nya alai, iya dekaka rayat Sarawak terus meri mandat besai ngagai Najib nyadi ketuai.

Berebak enggau nya, Adenan mega bisi nyadaka sekeda lagu baka Young One sereta Can’t Help Falling In Love, ti berega RM1 juta ngambika bisi diberi ngagai gerempung pengintu pengelantang pendiau.