Anang ngetu meri sukung ngagai tim Barisan Nasional

0

Kepala Menteri minta rayat meretika pekara tu laban agi mayuh pemansang deka dipejalaika udah tu

// Dikarang Rengenyan Labang //

SEMAK ENGGAU RAYAT: Adenan benung nyadaka lagu rambau Program Sejiwa Senada 2016 Bagi Menua Samarahan dikena merindang mensia mayuh ke bisi datai. Entara lagu ke disadaka iya maya tu ‘Youngs One’, Can’t Help Falling In Love enggau Biarlah Aku Pergi, seraya diperatika Ahmad Zahid enggau menteri kabinet ke bukai.

SEMAK ENGGAU RAYAT: Adenan benung nyadaka lagu rambau Program Sejiwa Senada 2016 Bagi Menua Samarahan dikena merindang mensia mayuh ke bisi datai. Entara lagu ke disadaka iya maya tu ‘Youngs One’, Can’t Help Falling In Love enggau Biarlah Aku Pergi, seraya diperatika Ahmad Zahid enggau menteri kabinet ke bukai.

KOTA SAMARAHAN: Kepala Menteri Datuk Patinggi Tan Sri Adenan Satem minta rayat nengeri tu anang ngetu meri sukung rat ngagai iya enggau tim Barisan Nasional (BN) maya pengawa bepilih nengeri ke-11 (PRN) 7 April tu ila.

Kebuah pia, ku iya ngambika mayuh agi pemansang ulih dipejalaika di nengeri tu dalam timpuh lima taun ke deka datai sereta dikena ngenukuka kuasa autonomi nengeri diterima baru nengeri tu.

Iya madahka 53 Polisi & Inisiatif ke udah digaga dalam timpuh dua taun nyadi kepala menteri, bedau chukup.

“Aku minta lima taun agi laban aku deka meda lebih mayuh ubah enggau pemansang nyadi di Sarawak. Nya kebuah aku numbuhka tim dikena ngemensangka Sarawak.

“Aku ukai gila pangkat deka nyadi kepala menteri lima taun agi, aku udah nyadi menteri ba perintah besai, menteri Sarawak udah, kaban parlimen udah, kaban kunsil nengeri pan udah.

“Mayuh ke ulih dipejalaika kitai…nya kebuah aku minta lima taun agi laban kita deka meda mayuh transformasi nyadi di nengeri tu. Dua taun nya enda chukup,” ku iya.

Adenan mansutka pekara nya lebuh bejaku ba Program Sejiwa Senada ke diatur ba Palan Paking Entular Kaunsil Pelilih Samarahan ditu, kemari.

Program nya kemari mujur dipenyadika Sapit Menteri Besai Datuk Seri Dr. Ahmad Zahid Hamidi.

Nambahka nya Adenan madahka kaul perintah nengeri enggau perintah besai patut dijaga enggau manah laban perintah besai ti nemu sereta meretika pemansang ke diguna nengeri tu.

Iya madahka perintah nengeri mayuh udah nerima ungkup belanja dalam timpuh enam taun Datuk Seri Najib Tun Razak nyadi Menteri Besai, kelimpah 49 kali udah nemuai ke nengeri tu.

Taja pan ekonomi enda meruan tang Menteri Besai ngungkupka RM16 billion dikena ngaga Jalai Besai Pan Borneo, iya nya projek ti pemadu besai, ku iya.

Lebuh ngenang Datuk Seri Ahmad Zahid ti bedau datai setaun nyadi Sapit Menteri Besai, Adenan madahka, iya (Ahmad Zahid) semilan kali udah datai ke Sarawak.

“Aku ti bebakih enggau Menteri Besai enggau Sapit Menteri Besai laban seduai iya ulih nulung nengeri Sarawak, ulih meri mayuh ungkup belanja ke nengeri tu.

“Nya kebuah kitai enda tau enda nyaga kaul ti manah enggau perintah besai,” ku iya lebuh nimbal tanya orang ti selalu nanya kebuah iya deka bebakih enggau Menteri Besai enggau Sapit Menteri Besai.

Sama bisi datai maya bejadika program nya kemari, bini kepala menteri, Datin Patinggi Jamilah Anu, Sapit Kepala Menteri Datuk Patinggi Tan Sri Alfred Jabu Numpang, Menteri Kereja Raya Datuk Seri Fadillah Yusof, Menteri Pengawa Berumah Datuk Amar Abang Johari Tun Openg enggau ke bukai.