KUCHING: Chairman Parti Tindakan Demokratik (DAP) Sarawak Chong Chieng Jen kemari netap rintai nama chalun parti ungkup Pengawa Bepilih Nengeri ke-11 (PRN11) deka dibantai kena 20 April 2016.
Bejaku ba seiti aum pengarang berita ke diatur di Indu Opis DAP ditu, Chong mega madah DAP deka nganjung chalun bediri ba 29 sitak bepilih Kunsil Nengeri (DUN).
Nambahka nya, iya ke mega Kaban Parlimen Bandar Kuching sereta penyandang N.12 Kota Sentosa madahka agih penuduk nya udah disetuju parti dalam Pakatan Harapan, kelebih agi enggau Parti Keadilan Rakyat (PKR).
“Agih penuduk tu disetuju raban ketuai DAP enggau PKR ba renggat menua. DAP deka nganjung chalun ba 29 sitak bepilih ke alai PKR 40 lalu tebal agi penyandang ari DAP deka ngenanka penuduk diri.
“PRN11 tu ukai seiti pengawa ke mudah lalu kitai (DAP enggau PKR) deka meratka gempung sereta pengering napi Barisan Nasional (BN).
“Semua pekara ungkup pemaik diri buai ke tisi dulu lalu kitai deka fokus ba pengawa bepilih ke deka diadu dalam timpuh 20 hari agi,” ku iya.
Aum pengarang berita nya kemari bela digulu Sekretari Besai DAP ke mega Kepala Menteri Pulau Pinang Lim Guan Eng.
Ba aum pengarang berita nya mega Chong pechaya kededua DAP enggau PKR ulih nyapai juluk ke ditetap gempung PH.
Sitak bepilih ungkup DAP iya nya N.2 Tasik Biru, N.9 Padungan, N.10 Pending, N.12 Kota Sentosa, N.14 Batu Kawah, N.17 Stakan, N.19 Mambong, N.22 Kedup, N.23 Bukit Semuja, N.32 Simanggang, N.45 Repok, N.46 Meradong, N.47 Pakan, N.49 Ngemah, N.51 Bukit Asek.
N.52 Dudong, N.53 Bawang Assan, N.54 Pelawan, N.61 Pelagus, N.62 Katibas, N.64 Baleh, N.66 Murum, N.68 Tanjung Batu, N.69 Kemena, N.70 Samalaju, N.73 Piasau, N.74 Pujut, N.75 Senadin enggau N.78 Mulu.
Ari rintai 29 penuduk nya ku Chong, lebih setengah ngarika penuduk di menua pesisir lalu DAP deka nyabung chalun bumiputera (Dayak).
“Kededua parti deka nganjung chalun ba penuduk dalam kandang mengeri enggau menua pesisir. Kitai keran deka ngarika rayat di kandang mengeri enggau menua pesisir.
“Kitai deka ngarika bansa Dayak, bansa China enggau Melayu Muslim ke alai (DAP enggau PKR) parti ungkup peranak Sarawak,” ku iya.
Ngenang kaul ke sama, Chong madah DAP deka ngelanchar raban pengawa bepilih parti ungkup kandang endur ari Tasik Biru nyentuk ngagai Simanggang kena 18 April 2016 berengkah jam 7:30 pagi (bepun ari Indu Opis DAP).