Undang-undang disiplin di sekula dipansik KPM baru

0

SIBU: Opis Menteri Pelajar Malaysia (KPM) diatu benung mansik baru undang-undang bekaul enggau displin dikena ngemanahka agi tikas displin di sekula.

Nya alai, Yayasan Penagang Jenayah Malaysia (MCPF) ngasaika perambu sekeda raban akademik sebedau tu ke deka numbuh komiti disiplin dikena mutarka isu disiplin di sekula ulih ngujungka pengawa betingkah.

“Apin lama ke udah aku bisi tebachaka sebengkah artikel ba surat kabar pasal juluk perintah deka meresai baru sekeda atur nyengkaum meri kusa ngagau kepala pengajar mutarka penanggul disiplin sereta ulih ngelusin nyema bisi pematut.

“Aku ngasaika nengah atur baru KPM ke deka mansik baru undang-undang ke bekaul enggau disiplin nembiak endang patut.

“Tang aku enda nemu sekalika komiti displin ke deka ditumbuh ba sekula nya atur ke engkeman laban skop pengawa lebih kurang sebaka lalu ulih ngujungka berepak pengawa,” ku Mandal Chairman MCPF Tan Sri Lee Lam Thye madah ngagai pemberita.

Sebedau nya iya bisi dipinta meri penemu bekaul enggau penerang ari KPM ke ngenang jaku Sapit Menteri Pelajar, Chong Sin Woon.

Chong ba jaku iya madah, Undang-Undang Pelajar (Disiplin Sekula) 1959, di baruh Ordinan Pelajaran 1957, deka diubah baru.

Tu betuju ngambika piak sekula ba serata menua ulih mutarka isu-isu seretai bepun taun baru.

Versyen ke pemadu baru nya nyengkaum isu-isu disiplin baka buli, enda nurun sekula. ngambi dadah sereta teparuk enggau ulah raban militan.

Apin lama ke udah, ngenang jaku Presiden Kaunsil Gempung PIBG Nasional Prof Madya Dr Mohd Ali Hassan antara raban akademik deka numbuhka komiti disiplin ke diarika raban pengajar, apai indai, piak polis enggau ketuai raban bansa dikena mutarka isu displin di sekula ke majak nyadi.