MADAHKA TIKAS PENGAWA: Pengari kunteriktor projek (kanan) meri penerang ke pemadu baru pasal pengawa ngaga projek Jematan Long Lama.
Projek ngaga jematan Long Lama nya udah lama dianti lalu seiti ari projek perintah ke pemadu besai
MIRI: Pengawa ngaga Jematan Long Lama ke beungkus lebih RM100 million deka berengkah ditampung baru pengudah pengerami Hari Gawai tu.
Kaban Kunsil Nengeri (ADUN) Telang Usan, Dennis Ngau madah ke bendar projek udah dipejalai kenyau ari bulan Februari taun tu tadi.
“Kunteriktor ti bejalaika pengawa nya diatu benung ngaga opis sereta meresi palan nya. Aku dipadah perengka dikena ngaga jematan nya benung diangkut ngagai palan projek,” ku iya pengudah meresa palan projek nya ba Long Lama bedau lama ke udah.
Ku Dennis, projek ngaga jematan Long Lama nya endang lama udah lama dianti lalu nyadi projek perintah ke pemadu besai di serata sitak Telang Usan.
“Projek tu ulih dikemujur berindik ari chara baru Kepala Menteri Datuk Patinggi Tan Sri Adenan Satem ti udah ngemendarka projek ti dipinta aku pun taun siti nyin kemari . Projek nya dipelaba tembu digaga ba taun 2019.”
Pengudah jematan nya tembu ila ku iya, ulih nyaup muka mayuh agi pemansang kelebih agi pemansang tanah ba peranak di Apoh enggau kandang tengah menua Baram.
Iya mega melabaka projek nya ulih meri batang pengawa ngagai peranak di Long Lama sereta lalu ngangkatka penatai pemisi sida.
Iya mega meransang peranak menua nya meri bekerejasama ngambika enda ngachau pengawa ngaga jematan nya, awakka ulih tembu nitih maya ti ditetap.
Berebak enggau nya, iya meri terima kasih ngagai perintah kelebih agi kepala menteri ti udah nyaup ngangkatka tikas pengidup rayat nyengkaum di Telang Usan.