KUCHING: Chairman Parti Tindakan Demokratik (DAP) Sarawak Chong Chieng Jen madahka diri tekenyit enggau pemadah pasal (komposisi) bansa ti gawa dalam opis Perintah menua tu.
Nundaku Chong, dalam berapa taun tu ke udah, Kunsil Nengeri (DUN) enda nerima tanya ke ditanya iya (Chong) pasal pechah tauka bagi bansa ke gawa ba opis Perintah di Sarawak.
“Speaker Kunsil Nengeri lebuh nya enda nerima tanya aku laban ku iya, isu nya tanya ke sensitif….Pemadah pasal pechah pupu bansa ke gawa ba opis Perintah Sarawak siti pekara ke nengenyitka aku,” ku iya madah nengah surat ti dikirum iya ngagai Bilik Berita ditu.
Chong ti mega nyadi Kaban Parlimen Bandar Kuching enggau ADUN Kota Sentosa madah, mayuh pekara dilalai Barisan Nasional (BN) lalu nya terang endar lebuh tanya bekaul enggau isu nya enda di saut.
“Isu tu ukai isu sensitif tang atur BN Sarawak ke ngaga pekara nya isu sensitif.
“Baka ke dibantai ba surat berita The Borneo Post apin lama udah, ari 1,478 pemungkal pengereja pengawa gawa ba opis Perintah Sarawak, 54 peratus (Melayu) lalu ditangkanka Dayak (28 peratus enggau China (17 peratus ),” ku iya seraya madah , kebuah enda sama rata pupu bansa terang endar kelebih agi ke pangku pengawa pemesai kanan.
Nitihka gred JUSA, 65 peratus nya Melayu, lalu Dayak enggau China semina 17 peratus.
Penyampau peratus nya ku iya, tampak endar enda setipak enggau pechah pupu bansa di menua tu, iya nya Melayu/Melanau 29.8 peratus, Dayak (45.3 peratus) enggau China (24 peratus).
“Taja pan perintah BN enggai mantaika pemadah nya ngagai aku sereta mensia mayuh, utai ke udah digaga menteri dulu agi ari nya dalam kabinet Sarawak, ngemendarka atur ke enda betul besiping ba bansa nya diperesa?,” tanya Chong.
Rayat Sarawak ku iya, seruran dipuji ngembuan pupu raban bansa ke beserakup tang BN Sarawak sumbung endar madahka sida iya enda besiping enggau semua pupu bansa.
Pekara ke tampak endar ku Chong, semina sebansa aja ke bulih mayuh agi penguntung ari raban bansa bukai.
Ku iya baru, atur pupu bansa, tampak endar nyadi dalam UMNO di Semenanjung Malaysia lalu ideologi ke baka nya enda patut dibai BN Sarawak tauka Parti Pesaka Bumiputera Bersatu (PBB) ngagai menua tu.
“Nya alai, aku deka betanya enti Perintah Nengeri Sarawak bisi chara bukai mutarka pekara ke enda sama rata tu?
“Enti bisi, bakani ku perambu Perintah Menua deka mutarka penanggul tu? Ni pengelama deka mutarka perambu tu ngambika pupu bansa ke gawa dalam opis perintah menua ulih dijapai nitihka pechah komposisi mensia mayuh ke diau di Sarawak,” ku iya.