// Dikarang Judan Bungap //
SIBU: Bala indu dara bansa Dayak menua tu ditesau ngambi bagi ba pekit Kumang Pengerami Mantaika Main Asal Dayak Borneo (BDCF) 2016 ke diatur beserimbai enggau Pengerami Mantaika Main Asal Bornoe (BCF) 2016.
Chairperson komiti pekit Angelyn Uchi madah, pemekit meseti beumur 18 taun lalu enda ngelui ari 30 taun.
Nambahka nya ku iya, pemekit mega enda ulih kurang peninggi ari 5 kaki 2 inchi.
“Bala pemekit dulu agi besemekih ba renggat keterubah ke diatur kena 25 Julai tu lalu ditangkan ba renggat ke dua (26 Julai) sebedau besemekih ba renggat kepenudi ti diatur kena 27 Julai ba panggau BDCF, Dataran Bandar Sibu,” pia ku iya madah.
Ku iya, bayar panjar dikena nyereta pekit tu iya nya RM10 ungkup seiku pemekit.
Kelimpah ari nya, iya mega madah, pekit Miss Photogenik ti bela bisi diatur deka begambar kena 17 Julai tu, pukul 8 pagi ba Taman Sungai Merah.
Uchi madah, gelar kumang deka mai pulai perais mata duit RM1,500 disempulang enggau trupi, selampai, jumpang enggau hamper lalu ditangkan lumur dua nerima perais mata duit RM1,200, trupi, selampai enggau hamper.
“Penuduk lumur tiga deka mai pulai perais mata duit RM1,000 disempulang trupi, selampai enggau hamper.
“Pemekit ke bulih lumur empat enggau lima mai perais mata duit RM500 enggau RM250.
“Penuduk lumur enam nyentuk ke-10 mai perais saguati mata duit RM200,” ku iya madahka baru.
Pengawa ngerijister enggau bepekit enda tau laun ari 15 Julai, pukul 5 lemai.
Penerang silik sentang pekit tu tau ditanya ngagai Angelyn Uchi di talian 016-8825861/084-336077, Rose Chukan (013-8313990), Priscilla Demi (0111-9353592) enggau Senorita Salleh (013-8061265).