MERUAN DIJAGA: Sebengkah ari Muzium Sains Petroleum di Canada Hill.
MIRI: Pemansang ba palan pengeraja asal di Miri, pintu penama adap utara Sarawak diadang ngubah ngubah rampa di nengeri tu kelebih agi ba Mengeri Besai Miri ba kar dunya.
Menteri Muda Dagang Temuai, Datuk Lee Kim Shin, enda masau jam ngerintaika servis enggau penau ari ejensi bekaul baka Opis Muzium Sarawak dalam ngelala produk pengeraja asal di Mengeri Besai Miri sereta ba kandang menua entigis ditu.
Apin lama ke udah, lepas sebulan mendingka penerang ari Opis Menteri Dagang Temuai, Seni enggau Main Asal Sarawak, Lee mai pemesai ari Opis Muzium Sarawak, diuluka Direktor Ipoi Datan betemu enggau ejensi bekaul nyengkaum opis residen ngambika begulai ngelala produk pengeraja asal ti deka digazet nyadi palan pengeraja asal.
“Rintai pemadu atas ungkup pemansang iya nya Opis Residen enggau Pelilih (RANDO) sereta mega Jabatan Agama Islam (JAIS) ti udah ditumbuh dalam taun 1912, pengudah minyak keterubah di menua tu ditemu ba Canada Hill dalam taun 1910.
“Aku udah merambu alai begunan lama ke ngundan sejarah deka digaga nyadi muzium pengeraja asal enggau main asal ungkup Miri mandangka pengeraja asal kitai dia alai kitai bisi lebih 30 raban etnik,” ku iya madah ngagai pengarang berita pengudah betuaika aum nya.
Iya nambahka pengawa nukar RANDO/JAIS nyadi muzium endang engkeman endar, laban opis nya deka mindah dalam kandang beberapa bulan agi ngagai kompleks begunan Baitulmal ke baru tembu, besepiak enggau Kedai Besai Boulevard.
“RANDO/JAIS nyadi palan strategik ba puak Mengeri Besai Miri, dalam dagang temuai deka nyadi palan sekali ngetu ungkup bala temuai enggau rayat menua tu ngulihka mayuh agi penerang pasal main asal, adat enggau gaya pengidup rayat, sereta mega ngenang sejarah menua Miri, ke mega ngembuan komuniti ekspatriat ti besai,” ku iya.
Ungkup pemujur ba muzium nya, Lee ngansak komuniti menua tu bela ngumpul keresa lama komuniti asal sida, main asal enggau barang-barang ke bisi nilai sejarah ngambika ulih dipandang dalam muzium nya.
Ku Lee, Kepala Menteri Datuk Patinggi Adenan Satem udah besetujuka perambu iya deka nukar RANDO nyadi muzium sereta ngemansangka palan pengeraja asal ke bukai.
Opis Muzium deka ngaga keretas kereja sereta deka meri belanja ungkup projek nya.
Palan pengeraja asal bukai ke deka disengkaum iya nya Rumah Belepa Perintah ba Tanjong Lobang – ke nyadi kuarters residen rambau pemerintah Bristish, Rumah Api Miri mega di Tanjong Lobang, alai keterubah Jipun sangkai rambau Perang Dunya Kedua, lalu bisi sekeda parai sereta ditumbakka diak.
“Ninting taun, bisi orang Jipun datai meri basa ngelawa endur nya, lalu dua bengkah pendam ke bukai mega deka disengkaum nyadika palan pengeraja asal – Memorial Park besemak enggau Sekula Sekondari (SMK) St. Columba alai bisi 20 iku bangkai orang Jipun ditumbak rambau perang nyadi, sereta mega Makam Datuk Permaisuri – ke ngembuan jerita panjai sebedau jeman Brooke,” ku Lee.
Ku iya nambah, Jematan Piasau ke nyadi endur keterubah bisi lampu trafik di Miri lalu nyangka keterubah ba Sarawak mega udah ditukar nyadi palan pengeraja asal.
“Dikena ngenapka jematan nya, Shell mega udah dipinta nyaga iya baka menua asal diri empu, pengabis nadai tiga buah rumah dalam kandang Rizab Kampung Galau Piasau ke baru digazet,” ku iya.
Ba luar Miri, sebengkah agi endur besejarah ti deka dirintai nyadi palan pengeraja asal iya nya Kubu Hose di Marudi, Lio Mato enggau Long Akah Forts, kededua di Baram.
“Kitai ngarapka perintah ngemeratka agi ba pekara pemansang palan besejarah tu, laban ke diatu Miri semina bisi ngerintaika dua bengkah pengeraja asal aja –Oil Well No.1 enggau ‘Japanese War Tunnel’ ari baruh Canada Hill,” ku Lee.
Iya mega minta perintah nyediaka mayuh agi servis penerebai bilun antarabansa terus ari Miri seraya nambah Miri diuan lebih 300,000 iku lalu mayuh ekspatriat gawa dalam industri minyak enggau gis ti beguna endar ke servis penerebai nya.
Miri nyapai status mengeri besai dalam taun 2005 diatu semina bisi sebuah muzium aja, Muzium Sains Petronas, besepiak enggau Oil Well No. 1.
Nyempelah pekara bukai, ku Ipoi madah, opis iya deka berati enggau silik kesemua palan ke dilanggur ke deka disengkaum dalam rintai pengeraja asal nyerumba pengawa sida deka ngubah palan nya sereta nyaga sereta ngintu palan besejarah, keresa lama Sarawak ari sebarang keruga, lenyau sereta punas.
“Kami deka mantaika keretas kereja ngagai perintah nengeri sereta kena minta belanja tambah.
“Dikena numbuhka muzium RANDO/JAIS nguna timpuh ke lama, dalam kandang dua tauka tiga taun.
Kami mega begunaka sukung ari mensia mayuh nyaup ngiga sereta ngumpul keresa lama dikena nyukupka keresa ke udah digumpul kami ngelama tu,” ku iya lebuhka dirandau The Borneo Post sepengudah aum nya.
Kurator Opis Muzium, Dayang Morzanah Awang Haddy madahka mayuh macham pengawa udah dipejalaika opis nya dikena meri penyedar ba sentang ‘Sarawak Cultural Heritage Ordinance 1993’.
“Penyedar tu udah nambah dua kali ganda setaun ke udah, tang ba perati diatu ngayanka mayuh rayat apin sedarka ordinan tu,” ku iya.
Sekeda ari aktiviti ke bisi dipejalai kelimpah ari program pemansang, baka program pelajar nyengkaum pengawa pemandang, licha, randau nyengkaum enggau bala pedagang keresa lama.
Ba program pemansang, ku iya, nengah Langgur Pemansang Malaysia Lumpar Ke-11 (RMK11), opis nya udah diagihka belanja penyampau RM25 juta dikena ngintu, ngemansang sereta ngaga baru sekeda muzium ke bukai dalam menua lama ti apin tau dibantai naka ke diatu.
Struktur palan besejarah tu nyengkaum Kubu Lili di Betong, Kubu Emma di Kanowit, Kubu Hose di Marudi, Kubu Sylvia di Kapit enggau Kubu Brooke di Meluan.
Naka ke diatu Sarawak bisi 12 buah muzium, ketebal agi di Kuching, lalu ba Bagi Menua Miri bisi tiga – Muzium Sains Petronas, Fort Hose di Marudi enggau Muzium Arkeologi Niah.
MUZIUM BARU: Begunan RANDO/Jais deka ditukar nyadi Muzium Pengeraja Asal Miri.