Saturday, July 31

Penyerakup rayat pupu bansa patut ditegapka agi, ku Mong

0

SRI AMAN: Kaban Kunsil Nengeri (ADUN) Bukit Begunan, Datuk Mong Dagang meransang bala chairman Komiti Pemansang Enggau Pengelikun Genturung Pendiau (JKKK), Rukun Tetangga enggau ketuai komuniti baka tuai rumah sereta ketuai tumpuk pendiau ngambika chakah agi sereta bisi produktiviti dalam bejalaika program-program komuniti ba renggat komuniti kelimpah ari nambahka pemanah ba pengawa ngedutka penyerakup kaul kelimpah ngemeranka pengawa nyaup perintah ngemansangka modal mensia ungkup pemaik semua.

Kenu ku iya, semua pengawa ke benung dipejalaika perintah enda ulih dijapai enti sema rayat enda begempung sereta bekerejasama.

“Kitai patut temegah ati enggau pengelui nengeri kitai tu ti ngembuan rayat enggau komuniti pupu bansa, main asal enggau jalai pengarap.

“Ba nengeri Sarawak tu, kitai ngintu bemacham pengerami ke bisi di nengeri tu alai iya nyadi penegap kitai begulai. Ambi ke chunto, pengawa ngatur bemacham Rumah Tebuka beserimbai enggau pengawa ngintu pengerami besai di menua tu udah ngayanka rayat kitai di Malaysida udah chukup beserakup sereta meretika konsep penyerakup ke bendar,” ku iya.

Iya mansutka jaku tu rambau bejaku bejadika Pengerami Jalinan Mesra Permuafakatan Kawasan Rukun Tetangga (KRT) Sri Aman diatur begulai enggau Opis Penyerakup Menua enggau Integrasi Bansa (JPNIN) Sri Aman bepa ditu, malam ensanus.

Ku iya, pengerami ke bisi di Malaysia tu ulih meri awak ngagai raban temuai ke datai ari menua luar lalu sida empu deka meda baka ni bala ketuai enggau komuniti kitai ulih bekunsi pengaga ati enggau pengerichah maya ngintu pengerami dalam pengelikun, pengelantang enggau penyenang.

“Kitai ulih idup enggau likun sereta lantang laban kitai seruran ngemeranka penyerakup sereta bekunsi kuasa enggau bala rayat pupu bansa. Penyerakup tu patut ditegapka agi sereta diterenak ba genap serak komuniti kelebih agi ba bala pemesai sereta bala ketuai komuniti,” ku iya nerang.

Anang mih kitai ngumbai penyerakup tu nyadi pekara ti mit lalu anang mega kitai mikir iya deka bisi belama iya taja kitai enda ngetanka iya. Keingat mih, penyerakup ti dijapai kitai diatu asal ari pengawa sereta pengorbanan sida ke dulu suba ke nadai ngira pengelelak dalam ngulihka kuasa merintah diri lalu pengudah nya ngetanka iya dikena nentuka penyerakup raban bansa bisi.

“Anang sesekali kitai ilap enggau penyenang ti diasaika kitai tu lalu anang kitai enda ingat alai kitai patut seruran nyaga penyerakup enggau semengat begulai bebaik ti dikembuan kitai diatu,” ku iya nandu.

Nya alai ku iya, endang nyadi pengandal ngambika pengawa ngatur pengerami ke bansa tu deka terus dipejalai enggau richah agi jemah ila.

Sama bisi datai rambau pengerami nya, Penulung Pemesai Pengereja Pengawa Sarawak ba Opis Residen Bagi Menua Sri Aman, Noor Hayati Ahmad, Pemancha Mas Shamsiah Maslem, Pemancha Micheal John Sanggop, Pengulu Abdul Samad Abdul Rahim, bala pemesai kanan ba JPNIN Bagi Menua Sri Aman sereta bala kaban KRT ke bukai.