Sarawak seiti ari empat menua numbuhka Malaysia, ukai nengeri

0

KAPIT: Sapit Kepala Menteri Sarawak Tan Sri Datuk Amar Dr James Jemut Masing ke mega nyadi Menteri Pemansang Infrastruktur enggau Pengangkut madahka 53 taun ke udah berengkah ari 22 Julai ngagai 16 September, Sarawak udah nyadi bansa merdeka. Stephen Ningkan dipadu nyadi Kepala Menteri Sarawak.

“Lepas 22 Julai 1963 Sarawak nyadi menua merdeka urung 53 taun ke udah. Lebuh kitai numbuhka Malaysia, kitai ditumbuh nyadi bansa ke merintah diri empu. Kitai ngaga pemutus kediri empu.

“Kitai ngereja pengawa nitihka penau diri sereta kitai bisi perintah kediri empu. Nya alai ngereja pengawa enggau pemutus perintah Sarawak. Kitai ukai dipejal sesapa,” ku Masing.

Ku iya, nya kebuah beguna amat kitai meseti meretika Sarawak tu seiti ari empat menua ti numbuhka Malaysia sereta kitai ukai seiti ari tiga belas nengeri di Malaysia. Kitai ukai sebengkah nengeri. Kitai sebengkah menua ti numbuhka Malaysia.

Nya alai ku iya, rayat meseti meretika pekara tu. Diatu kitai seiti ari tiga menua numbuhka Malaysia. Tiga menua tu iya nya Sarawak, Sabah enggau Persekutuan Tanah Melayu ke meseti diperatika rayat. Pekara ti pemadu beguna kitai ukai seiti ari nengeri lalu rayat meseti meretika pekara nya.

“Perintah Nengeri benung berandau enggau Perintah Besai mulaika baru hak kitai ke udah dipesetuju nitihka Sempekat Malaysia 1963.

“Kitai benung ngereja iya diatu. Iya deka ngena awak ke lama. Kitai meseti begempung nyapai nya,” ku Masing kena lemai Hari Lima, 22 Julai rambau bejadika Program Nutup Gawai Dayak 2016 enggau Angkat Sumpah Komiti Nembiak Gerempung Bansa Dayak Sarawak (SDNU) Kapit ba Town Square ditu.

Iya merambu ngagai SDNU Kapit ngambika ngatur aktiviti ba Town Square ngambika mayuh orang ulih datai ngulu laman nya.

“Menua tu diempu semua kitai. Raban nembiak nyadika reta pemadu berega. Dunya ke diatu diempu kitai (bala pemesai ke diatu). Lima ngagai sepuluh taun ke deka datai, dunya dipenggi raban nembiak ke diatu.

“Nya alai, raban nembiak meseti nyikap diri empu, berunding enggau nyaga ulah sereta bejejimat. Dunya jemah ila bepanggai ba jari bala kita. Raban Nembiak SDNU meseti berunding memanah sereta pintar bejalaika pangku pengawa sida dalam nempa bansa,” ku iya ngelalau.

Ba pekara pemansang infrastruktur enggau penyikap perengka guna, ku Masing mayuh aktiviti pemansang dipejalaika dalam nengeri tu.

“Anang kelalu berumban baban ngaga pemutus. Bisi sekeda orang madahka nadai pemansang. Pekara tu bula. Mayuh aktiviti pemansang dalam nengeri tu sereta mega di Kapit.

“Aku meri seiti chunto projek jalai ari Mujong ngagai Nanga Antawau, Sungai Baleh.

“Pengawa ngaga jalai sepemanjai 73.3 kilometer ti beungkus RM1.4 bilion tu enda ulih tembu sehari dua. Pengawa ngaga jalai tu ngena awak ke lama lalu kitai melabaka jalai tu tembu ujung taun 2018.

“Mayuh orang saru. Nya alai aku ngansak raban nembiak SDNU ulih nyaup meri penerang ngagai bala rayat ba pemansang ke udah digaga kitai tang iya nguna awak ke lama ditembuka. Rayat meseti besabar.

“Bala kita patut nyaup ngemansangka Kapit laban tu menua asal kita sereta kitai ulih besaup ngemai Kapit tu nyadi menua ke manah agi ungkup semua kitai. Kitai begulai. Nyaup kami ngasuh Kapit nyadi menua ke menyana agi. Kita nyaup aku lalu aku deka nyaup kita. Begulai kitai ngasuh pekara tu nyadi nyata,” ku iya.

Berebak enggau pengerami nya Masing ngemendarka geran perintah penyampau RM20,000, Kaban Kunsil Nengeri (ADUN) Pelagus, Wilson Nyabong Ijang (RM10,000) lalu Kaban Parlimen (MP) Ulu Rajang, Datuk Wilson Ugak Kumbong (RM 5000) ditambah enggau penyampau RM35,000 ungkup Raban Nembiak SDNU bejalaika aktiviti rama sida.

Dulu agi ari nya, penatai Masing enggau sida sebuat dilalu enggau adat asal Iban, miring sereta pantun, ditangkan enggau pengawa ngiling tikai ngelai pengawa nutup pengerami Gawai Dayak 2016.

Iya mega bisi melah kek ngintu Hari Sarawak Merdeka sereta ngelancharka komiti Nembiak SDNU diketuaika Juson Jarraw.

Bala bukai ke sama bisi datai iya nya MP Ulu Rajang, Wilson Ugak Kumbong, ADUN Pelagus, Wilson Nyabong Ijang, Pemesai Opis Pekara Khas (JASA) Sapit Menteri Besai, Jackson Melintang, Residen Kapit, Joseph Belayong, Pemesai Pelilih Bukit Mabong, Douglas Pungga enggau Chairman SDNU Kapit, Joseph Jinggut.

Pengerami lemai nya dirichahka enggau Pekit Miss Sarawak Independence Day, Karaoke, Pemerindang Live Band, Bansal Hari Merdeka sereta ke bukai.