TEPA: Henry (dua kiba) nyuaka tepa ngagai Adenan, ti udah bejadi Hari Koperasi Negara Peringkat Nengeri Sarawak, seraya dikemataka Awang Tengah ((kanan).
SEMATAN: Perintah nengeri ngansak mayuh agi koperasi ditumbuh sereta mayuh agi orang nyadi kaban koperasi di nengeri tu awakka pemekal enggau pemborong enda dikeruga orang tengah ti ngujungka orang ke seranta ulih pansut ari panjuk penyeranta.
Kepala Menteri, Datuk Patinggi Tan Sri Adenan Satem madah, laban koperasi nya ulih mantu kelebih agi orang bumai bekebun sereta orang berikan ari kena keruga orang ke ngambi untung kediri empu.
Ku iya, sebedau koperasi ditumbuhka, orang bumai bekebun enggau orang berikan ti bejualka asil sida, suah endar orang tengah ngambi untung kediri empu.
Dulu suba ku iya, orang bumai bekebun enggau berikan agi dalam panjuk penyeranta, dikena ngemansutka diri ari nya kitai numbuhka operasi, laban nengah koperasi kitai ulih nyaga sereta berunding sesama diri.
“Diatu kitai udah ulih ngemansutka diri ari panjuk nya, tambah mega udah bisi jalai kitai ulih terus nyual ngagai orang ke deka meli tauka begunaka barang, enda ibuh ngena orang tengah.
“Diatu mayuh macham koperasi ditumbuhka, kebuah ditumbuh ngambika pengawa beambi ulih ari orang bumai bekebun enggau orang berikan tauka orang seranta ulih diketuka.
“Aku gaga ati laban penyampau kaban koperasi betambah, pia mega penyampau koperasi majak mayuh, kitai ngansak mayuh agi nyereta koperasi,” ku iya.
Adenan mansutka pekara nya lebuh bejadika ‘Hari Koperasi Negara Peringkat Negeri Sarawak dan Pesta Sematan’ ke diatur Opis Menteri Dagang Dalam Nengeri, Koperasi enggau Pekara Bebeli Barang enggau Opis Menteri Industri enggau Pemansang Orang Dagang, Pengawa Dagang enggau Pemeranak Puku di Dataran Sematan di Sematan ditu, kemari.
“Kitai beterima kasih ngagai Perintah Besai laban numbuhka opis menteri ke ulih nulung orang ke minta tulung,” ku iya.
Nambahka, Menteri Industri enggau Pemansang Orang Dagang, Pengawa Dagang enggau Pemeranak Puku Datuk Amar Awang Tengah Ali Hasan madah, di Sarawak udah mayuh koperasi ditumbuhka di serata nengeri.
Iya meransang koperasi nengeri tu patut regas agi ngemansangka koperasi laban nya ulih nyungkak sosio ekonomi kaban koperasi sereta ekonomi menua.
Iya muji laban renggat sekula udah ditumbuhka koperasi, ke ulih nempa reti pemaik koperasi ba bala nembiak sekula.
Nyentuk ke diatu koperasi di Sarawak chakah dalam aktiviti borong enggau renchit, betanam betupi, industri bumai, dagang temuai enggau ke bukai.
“Di Sarawak bisi 931 buah koperasi ti nyengkaum 748 buah koperasi ungkup mensia mayuh enggau 183 buah koperasi sekula. Lalu semua koperasi nya bisi urung 330,000 iku kaban koperasi.
“Ari pemayuh koperasi di Sarawak nya mega bisi ke regas lalu bisi mega ke enda regas. Ngagai koperasi ke regas nya kitai minta ngambika lebih aktif agi lalu ngagai ke enda aktif nya kitai minta bala ketuai sereta kaban koperasi nya berunding panjai,” ku iya.
Berebak enggau tu iya ngarapka koperasi di Sematan ulih ngambi peluang ngemansangka koperasi ngena produk dagang temuai ke dikembuan menua nya.
Sama bisi datai ngagai pengerami nya kemari bini Adenan, Datin Patinggi Datuk Jamilah Anu, Menteri Muda Pemansang Orang Dagang Datuk Mohd Naroden Majais, Sapit Menteri Dagang Dalam Nengeri, Koperasi enggau Pekara Bebeli Barang Datuk Henry Sum Agong, Speaker Kunsil Nengeri Datuk Amar Mohd Asfia Awang Nassar enggau kebukai.