Kapit menua ke besai sereta agi beguna mayuh bengkah pemansang
// Dikarang Magdeline Janin //
KAPIT: Sapit Menteri Pemansang Menua Pesisir enggau Kandang Menua, Datuk Alexander Nanta Linggi madah, Kapit tu seiti menua ke besai lalu begunaka penyakah dikena ngemansangka menua nya.
Iya bejaku munyi tu lebuh bejadi Program ‘Ramah Tamah Aidilfitri 2016’ ke diatur ba Dewan Mayuhguna, Kpg Muhibah, di Jalai Beleteh ti diatur JASA enggau Lembaga Amanah Khairat Pelilih Kapit.
“Kapit tu seiti menua ke besai lalu kitai meseti besaup ngemansangka menua tu. Pengari rayat patut gawa nyadi seiti tim mai pemansang kelebih agi baka perengka guna enggau pemansang ke bukai ke Kapit ditu. Perintah ukai semina meri akses baka jalai, bekal eleterik, bekal ai beresi tang KKLW mega bisi meri bantu baka wang turu pelajar dikena ngangkatka agi tikas kualiti pengidup kitai di menua pesisir,” ku iya
Beserimbai enggau program nya, Nanta udah meri geran ari perintah sepenyampau RM10,000 ngagai Kpg Baru, RM10,000 ngagai Kpg Muhibah, RM10,000 ngagai Kpg Bleteh Fasa 2 sereta RM5000 ngagai Biro Indu Sarikei ke nyadi temuai ba program tu tadi.
Kelimpah ari nya, Kaban Parlimen P216 Hulu Rajang, Datuk Wilson Ugak Kumbong madahka Menteri Besai Malaysia, Dato Seri Najib Razak deka meda pengari rayat begulai sereta bekempit enggau rayat.
“Taun 2020 udah majak semak. Tetiap iku kitai meseti ngubah runding ngagai pekara ke manah agi. Kitai meseti lebih pro-aktif ngangkatka status sosio ekonomi kitai lebuh Malaysia nyapai juluk nyadi menua bepemisi tinggi dudi hari ila,”
“Pengari rayat Kunsil Nengeri udah ulih belelak naka ke diatu laban maya sida bepilih sida udah ngelebus, tang kami nyadi kaban parlimen meseti gawa bebendar agi laban kitai enda nemu kemaya pengawa bepilih besai deka diaturka baru,” ku Ugak.
Kelimpah ari nya, pengari rayat Bukit Goram, Jefferson Jamit meri terima kasih ngagai rayat ke udah meri sukung lebuh pengawa bepilih tu tadi. Iya mega madah deka meri geran ari perintah RM6,500 dikena ngemanahka Dewan Mayuh guna nya sereta meri RM5,000 agi ngagai tetiap genturung pendiau iya nya Kpg Baru, Kpg Muhibah enggau Kpg Bleteh Fasa 2.
Sama bisi datai, Kaban Kunsil Nengri Pelagus, Wilson Nyabong Ijang, sekretari politik, Tapah Ata enggau Nicholas Kudi, Residen Pelilih Kapit, Joseph Belayong enggau ke bukai.