KUCHING: Pemisi dua pampang opis bukai ari baruh Opis Kampung, iya nya Opis Taman Negara enggau Opis Jelu Siga deka ngemujurka agi 31 kandang menua ti dijaga penuh tauka TPA ti mega nyadi opis ke mangku tanggungpengawa ngemataka kandang endur sida empu ti disadang deka dibuka dalam bulan Januari taun baru tu ila.
Direktor Opis Kampung, Sapuan Ahmad madah pemisi dua buah pampang opis tu ulih mantu Opis Kampung ngintu kandang endur sida empu, laban diatu Opis Kampung mayuh agi berat beratika pekara bekaul enggau lisin kayu.
“Pemisi dua pampang opis, Opis Taman Negara enggau Opis Jelu Siga deka nyaga kandang endur sida empu, laban ngelama tu Opis Kampung minta tulung ari opis Sarawak Forestry Corporation nyaga kededua pampang tu.
“Sekeda ari Taman Negara ke enda dijaga Opis Kampung, diserah ngagai kompeni peribit baka nyaga Taman Negara Mulu, ke ari baruh kemata kompeni Borsa Mulu,” ku Sapuan.
Iya madah munyi nya lebuh dikerandau pengudah bejadika licha ‘Managing Beyond Boundaries’ ti diatur Opis WWF nengah bekerejasama enggau Opis Kampung di Dewan Majma, Komplek Islam ditu, kemari.
Baka di semenanjung ku iya, semina bisi siti aja opis ke nyaga Opis Kampung, Taman Negara sereta Jelu Siga sida, ukai baka enggau di Sabah ke bisi Opis Kampung, Taman Negara Sabah enggau Opis Jelu Siga, ke sebaka enggau di Sarawak.
“Kepala Menteri bedau lama tu tadi minta TPA kitai ulih mungkur urung sejuta hektar tang kitai ngarapka ngelui agi ari nya, urung 1.2 juta hektar. Nya alai, pemisi dua buah pampang ops tu, ulih ngenyampatka pekara nya,” ku iya.
Naka Julai 2016, Sarawak udah ngelai urung 903,769 hektar nyadi TPA, ke ngembuan 43 Taman Negara (694,770 hektar), 14 buah (Nature Reserve) (2,539 hektar) enggau 6 buah Santuari Jelu Siga (206,460 hektar.
“Ari keterubah suba, Perintah Menua udah ngelaika sesiti kandang endur ngambika ulih nyadi Taman Negara laban deka ngemansangka komuniti ba endur nya,ngambika setipak enggau pemansang menua ti udah diperambu.
“Lebuh Perintah deka ngelaika sesiti kandang endur nya nyadi TPA, ukai reti komuniti dia deka lenyau hak sida,” ku iya.
Baka Opis Jelu Siga ku iya, berat ngemataka jelu ti dikelala ulih meri penusah ngaga komuniti di Sarawak baka baya (di Semenanjung, rimau, gajah enggau tapir).
Ba atur pengawa nya kemari, Opis Kampung meri kelala sereta meri ‘Anugerah Khas’ ngagai Sami Nor, ti ngemeratka Taman Negara Bako di kelai nyadi TPA. Pemujur Taman Negara Bako nyadi pekara ke instrumental ngulihka mayuh agi kandang endur dikelaika nyadi TPA.
Sarawak diatu ngembuan urung lebuh 50 kandang endur dikelaika nyadi TPA.
Sama bisi ngulu atur pengawa nya kemari, Ketuai Program Sarawak WWF Dr Jason Hon, enggau Sapit Menijar Besai SFC Oswald Braken Tisen.