KELAI PEMUJUR: Uggah (kanan) nerima bup pasal pemujur pengawa betanam betupi di Sarawak ari Ngenang.
Ngambika ulih ngangkat sereta ngedut seraka penatai pemisi peranak di menua pesisir enggau di mengeri
Dikarang Jacqueline R. David //
SANTUBONG: Komuniti menua pesisir ngarapka Perintah Nengeri majak ngemujurka pengawa ngubah sektor menua tu, ukai semina ngangkatka pemisi menua pesisir aja tang mega ngedut seraka pemansang antara menua pesisir enggau nengeri.
Sapit Kepala Menteri Datuk Amar Douglas Uggah Embas madah udah lama endar pemansang di menua pesisir jauh tinggal ari nengeri, tang diatu pengawa deka ngedut takah pemansang nya dikemeratka.
“Diatu kitai bemain enggau ‘catch-up game’, iya nya strategi kitai, chara kitai deka bejalaika pemansang sereta pelin ke deka digaga enda tau enda di ubah.
“Transformesyen nya nyengkaum ‘quantum jump’, anang agi ngena chara konvensional ti suah dikena ngelama tu, tauka ddikumbai ‘business as usual’.
“Quantum change’ ulih dibida ari ‘incremental change’, ke seruran dikaul enggau proses asal lalu ubah kuantum dalam ‘proses dagang’ dikearapka meri pemutus ti ulih ngemanahka penguntung sereta asil ari nya,” ku Uggah.
Iya madah munyi nya, lebuh bejadi ‘Bengkel Transformesyen Ekonomi Menua Pesisir Sarawak’ ti digulu lebih urung seratus iku pesereta ari raban pengelicha ti bepengelandik dalam pemansang ekonomi, pakar pengatur penyampau pengereja pengawa enggau orang ti bepeneleba dalam dagang di Damai Beach Resort, semak ditu, kemari.
Uggah ti mega Menteri Pengawa Betanam Betupi Moden enggau Ekonomi Menua Pesisir (MOARE) nandu baru, transformesyen semina ulih datai enti bisi ubah ba chara berunding ba sida industri, nyengkaum orang ke ngaga polisi, tukang perambu, orang ke ngemeran, komuniti orang dagang sereta gerup ti ditagit.
“Dalam konteks pengawa betanam betupi, sereta transformesyen ekonomi menua pesisir, tanggung pengawa nyadi ketuai ukai bepanggai ba menteri aja, tang mega ba menteri muda, sekretari mendam, direktor sereta tuai ejensi,” ku iya.
Iya madah, transformesyen pan patut disengkaum sekali enggau inovasyen enggau kreativiti lalu pengemeran industri enda tau enda ngembuan runding tebuka ngagai penemu baru ari mayuh bengkah pemisi.
Ba pekara bekaul enggau ngurangka bida pemisi, pemerat iya nya takah pemisi antara menua pesisir enggau nengeri.
“ Taja udah 50 taun merdeka lalu mayuh endar ungkup belanja udah dikena ngemansangka nengeri tu tang agi mayuh komuniti kitai di menua pesisir jauh tinggal ari ari sukut ekonomi.
“Tu ulih dipeda nengah seraka ti besai antara pemisi sesebuah ruang bilik ba mengeri enggau menua pesisir. Dalam taun 2014, pemisi ruang bilik di mengeri (Sarawak) bisi RM6,075, dibanding enggau sebuah ruang bilik di menua pesisir semina bisi RM3,387. Reti nya, puku rata sebuah ruang bilik semina bisi 44 peratus kurang agi ari sida ke diau di mengeri,” ku iya.
Uggah nandu baru madahka, siti agi kelai mandangka bida dalam sosio-ekonomi entara ruang bilik di menua pesisir enggau di mengeri iya nya penyeranta.
“Dalam taun 2014, ikas penyeranta ruang bilik di menua pesisir bisi 1.6 peratus lalu sida ke diau ba mengeri dirikod 0.5 Peratus. Puku rata bisi 0.9 peratus, lalu tu mandangka rikodpenyeranta di menua pesisir dalam taun 2014 bisi 3 kali lipat bida dibanding enggau di mengeri,” ku iya.
Taja pia, iya madah pengawa ngerapit takah pemansang di menua pesisir mayuh udah dipejalai lalu bisi mandangka pemujur.
“Diatu, kitai ulih ngurangka ikas penyeranta ari 56.4 peratus (kenyau ari taun 1970-an kelia) ngagai 1.6% diatu.
“Berindik ari nya, kitai patut meda sekeda chunto bukai bakani ku kitai ulih ngemunaska penyeranta. Keterubah kitai beratika model ti dikena kitai diatu, ke mujur dikena deka dikena baru, lalu ke enda ulih dikena agi deka diganti enggau model baru baka ti udah dikena ba sekeda menua bukai. Ngarapka kitai pan ulih ngena model nya sama ngemujurka program transformesyen ke engkeman agi ungkup ekonomi menua pesisir,” ku iya seraya madahka chunto model dikena menua Thailand.
Nangkan nya, Bajet 2017 ti deka dibantaika Menteri Besai Datuk Seri Najib Tun Razak tengah bulan Oktober tu ila, Uggah ngarapka opis menteri betanam betupi deka terus dibantu.
Sama bisi ngulu pengerami nya, Menteri Muda Ekonomi Menua Pesisir (Menua Ulu) enggau Industri Kebun, Datuk Francis Harden Hollis, Sapit speaker Kunsil Nengeri, Datuk Gerawat Gala, Sekretari Mendam MORARE, Datuk Dr Ngenang Jangu sereta Ketuai Pemesai Eksekutif Institut Pemansang Sarawak (SDI), Datuk Aloysius J. Dris.