Sejarah menua siga patut dikunsika nengah bup

0

Mayuh bala bujang berani ti bela enggau ngetanka pengelikun menua suba nadai ditemu cherita

// Dikarang Judan Bungap //

SIBU: Mensia mayuh ti bisi nemu cherita tauka ampit ngasaika pengawa ngetanka pengelikun menua rambau agi siga suba sebedau Rajang Area Security Command (RASCOM) ditumbuh dipinta bekunsika pekara nya.

Panglima 1 Divisyen Mejar Jeneral Datuk Stephen Mundaw madah, cherita nya patut dikarang sereta dichelak nyadi bup ngambika semampai dikenang kelimpah nyadi sejarah ti berega ngagai nengeri tu.

“Mayuh bala bujang berani maya ngetanka pengelikun suba enda ditemu cherita.

“Nya alai, enti bisi cherita enggau pengingat lebih agi bala raban pengetan pengelikun maya nya anang sanggu nulis cherita kita baik ke nya enda mayuh tauka semina selambar aja.

“Sejarah tu patut ditemu bala mayuh laban sejarah baka tu mai mayuh lalau ngagai kitai rebak baru,” pia ku iya madah.

Iya mantaika jaku nya maya dipebasa bejadika bup ‘Sigai Bujang Berani’ ke dikarang Leftenan Kolonel (B) Linus Lunsong Janti ba sebengkah hotel tebilang ditu, kemari.

Sama bela ngerami pengawa tu iya nya Kaban Parlimen Julau Datuk Joseph Salang Gandum, Kaban Kunsil Nengeri (ADUN) Tamin Ir Chirstopher Gira Sambang, Sekretari Politik Kepala Menteri Edwin Banta enggau Maurice Giri sereta Temenggong Stanley Geramong.

Nambah jaku iya baru, ku Mundaw, cherita enggau pengingat ke udah dikarang baru nya tau dikunsi enggau mensia mayuh ba Muzium RASCOM.

Bekenangka bup nya, iya muji pengawa Linus ti udah ngarang enam bengkah bup nyengkaum ‘Sigai Bujang Berani’ tu.

Ku iya, pengawa Linus tu patut dichunto mensia mayuh ke bukai.

“Bup ke dikarang iya tu endang ngenang bala bujang berani maya pengawa muru penyelawai Komunis kelia.

“Ari bup tu, cherita bala bujang berani kelia ke enda dikelala tau ditemu mensia mayuh,” ku iya madahka baru.

Bup keterubah ke dikarang Linus iya nya, ‘The Little Iban Warrior’ kelimpah bup ke bukai baka ‘The Little Iban In RASCOM’, The Little Iban At The Mountain’ enggau ‘Nyayang Bujang Berani’.

Linus sebedau pengawa nyadi madahka cherita ke dikarang endang bepelasarka pengingat tauka peneleba maya betempuh sereta nyidi komunis suba.

“Pengingat tu enda ulih dibeli enggau mata duit.

“Aku berani madah, raban penyidi kami endang chukup landik nyidi munsuh lalu pengelandik tu agi ulih dikena nyema raban soldadu randaka penemu kami,” pia ku iya madah.

Ngelai sukung ngagai pengawa Linus, Mundaw maya tu meli seiti bup ‘Sigai Bujang Berani’ enggau rega RM2,000 kelimpah ditambah enggau RM3,000 ari turu RASCOM.