Friday, April 26

Masterpiece, Melissa Francis, Karen bela teulihka pemujur ba AMD 2016

0

KUCHING: Masterpiece, Melissa Francis enggau Karen Libau nempa pemujur ba Anugerah Muzik Dayak (AMD) 2016 ke diatur di Palan Aum Borneo Kuching (BCCK) ditu, malam ensanus.

Kededua artis enggau band nya menang tiga gelar ba anugerah ke diatur Gerempung Artis enggau Pemuzik Dayak (DAMA) ungkup keempat kali.

Melissa menang ba kategori Lagu Pemadu Tebilang enggau Lagu Balada Pemadu Manah ungkup lagu “Sepenuh Nyawaku” sereta Lagu Iban Pemadu Manah nengah lagu “Andau Pengerindu”.

Karen menang ba kategori Lagu Pop Pemadu Manah, Vocal Indu Pemadu Manah enggau Artis Baru Pemadu Manah nengah lagu “Karam Ba Ati”.

Band tebilang, Masterpiece menang kategori Album Iban Pemadu Manah nengah lagu “Ngarap Ka Nuan Nikal Pulai”, Vokal Pemadu Manah ungkup ketegori beraban sereta Pemerindang Pemadu Manah malam nya nengah lagu “Ngap Sayot”.

Band Bidayuh Mezzavoce menang ba kategori Lagu Rock Pemadu Manah nengah lagu ‘Paded’.

Seiku agi penanyi Bidayuh, Micheal Gayut bela nempa pemujur ba AMD 2016 ke alai iya menang ba kategori Lagu Single Pemadu Manah enggau Vokal Pemadu Manah Lelaki nengah lagu “Kubur Cinta”.

Pemenang ke bukai iya nya Hairee Francis -Anugerah Muzik Pemadu Manah ungkup lagu “Happy Sampai Pagi”, Masan Kaya (Kulit Album Pemadu Manah –Leez Zwita’s “Ukai Antah Dipilih Nuan”), Ezra (Album Bidayuh Pemadu Manah) enggau Carrie Geres (Lagu Bidayuh Pemadu Manah ungkup “Tenggie Ku”).

Baka ke udah, tiga gelar Anugerah Penau Seumur Idup sereta seiti Anugerah Khas bela disedia ba AMD 2016.

Gelar nya diungkup ngagai tiga sub-etnik besai Dayak Iban, Bidayuh enggau Orang Ulu.

Ungkup Iban gelar diberi ngagai Antonio Jawi, Bidayuh-Cindy Nifkiman Ahid lalu Orang Ulu diberi ngagai Tusau Padan.

Ngerichah pengawa malam nya, penanyi tebilang Indonesia Cita Citata datai merindang panggau AMD malam nya.

Cita ke ngaku diri bansa Dayak maya ditanya pemberita dulu agi ari nya nyadaka enam lagu nyengkaum lagu tebilang “Goyang Dumang”, “Sakitnya Tuh Disini” enggau “Perawan Atau Janda”.

Semua perais disua Sapit Kepala Menteri Tan Sri Datuk Amar Dr James Masing.

“Anugerah tu nyadi seiti platform manah endur bala pemuzik Dayak ngansah pengelandik sida. AMD masa semua pemuzik enggau artis ke ngembuan pengelandik ba dunya musik,”ku Masing ba aum pengarang berita dulu agi ari nya.

Bela datai Presiden DAMA Snowdan Lawan, Chairman Kaunsil Penyanding Penemu 1M Sarawak Datuk Joseph Salang Gandum enggau Menteri Muda Betanam Betupi Malcolm Mussen Lamoh.